Փակ դռներն ուսանողներին չեն հուսահատեցնում. դասադուլը վաղը կշարունակվի

Այսօր ԵՊՀ-ի գլխավոր մասնաշենքի դիմաց ուսանողները, «Հանուն գիտության» նախաձեռնության անդամների աջակցությամբ, դասադուլ էին հայտարարել: Նրանց պահանջն էր՝ վերանայել «Զինվորական ծառայության և զինծառայողի կարգավիճակի մասին» օրենքի նախագիծը, որով տարկետման իրավունքը վերացվում է կամ տրվում այն ուսանողներին, որոնք ՊՆ-ի հետ պայմագիր կկնքեն:

Ուսանողների պնդմամբ՝ այս նախագծով իրենց զրկում են որոշելու հնարավորությունից: Բողոքող ուսանողները պահանջում էին հանդիպում ԿԳ նախարար Լևոն Մկրտչյանի հետ: Նախարարը, սակայն, որևէ կերպ չարձագանքեց: Ուսանողները շրջեցին ԵՊՀ տարբեր ֆակուլտետներով և համալսարաններով: ԵՊՀ-ում ուսանողներից մեկին Ժուռնալիստիկայի ֆակուլտետի դեկանն էր կանչել ու հորդորել դասերը չխանգարել: Իսկ աշխարհագրության ֆակլուտետի դեկան Մարատ Գրիգորյանն էլ ցուցարարներին դիմելով ասաց, որ բոլորն առանց բացառության պետք է ծառայեն: Ուսանողները հակադարձեցին՝ իրենք չեն խուսափում ծառայելուց, պայքարում են ոչ թե բանակից խուսափելու , այլ որոշելու իրավունքից չզրկվելու համար:

Ուսանողներն այնուհետ բախվեցին փակ դռներին: Ցուցարարները երթով կրկին վերադարձան ԵՊՀ-ի տարածք: Նրանք անհատական փակ նամակներ են ուղարկելու ԿԳ և ՊՆ նախարարներին: Ցուցարարները նշում են, որ փակ դռներն իրենց չեն հուսահատեցնի. «Մենք կարծում ենք, որ եթե ուսանողությունը միասնական լինի ու կարևորի իր դերը, մենք կունենանք դրական արդյունք: Եվ ինչպես ասում են, եթե ճանապարհի կեսից մտածես ձախողվելու մասին, ապա կձախողվես, մենք մարտական ենք տրամադրված ու պայքարելու ենք, որ տարկետման իրավունքը չսահմանափակվի»:

Հավաք-երթի ավարտին ուսանողները տեղեկացրին՝ դասադուլը հայտարարել են անժամկետ: Բողոքի ակցիան վաղը կշարունակվի:

Լիլիթ Շաբոյան