Այսօր կորոնավիրուսից մահացածը Մարալիկի բնակիչ է. նա մի շարք ուղեկցող հիվանդություններ է ունեցել

Այսօր կոնորավիրուսից մահացած տղամարդը Մարալիկի բնակիչ է. նա մի շարք ուղեկցող հիվանդություններ է ունեցել։ Factor.am-ի հետ զրույցում այս մասին տեղեկացրեց Անի խոշորացված համայնքի ղեկավար Արտակ Գևորգյանը։

Հիվանդը բուժում է ստացել Գյումրիում, ապա տեղափոխվել է Երևան։

«Վերջին 15-20 օրվա մեջ նրա առողջական խնդիրներն ավելի ծանր էին, քանի որ սրտի խնդիր ուներ, շաքարային դիաբետ: Բուժումներ է ստացել, բայց վերջում ի հայտ է եկել, որ իր մոտ առկա է նաև կորոնավիրուս»,- ասաց Արտակ Գևորգյանը։

Մահացածը արտերկրից չի եկել, դեռևս պարզ չէ՝ ինչպես է վարակվել։ Ըստ համայնքի ղեկավարի՝ նրա շփման շրջանակը փոքր է, այժմ բոլորը մեկուսացված են։

«Իր շփումը տեղում շատ սահմանափակ էր: Նա վերջին տարիներին առողջական լուրջ խնդիրներ ուներ։ Որսորդ էր, բնության հետ էին ավելի շատ շփումները։ Երեխաներ ունի՝ աղջիկներն ամուսնացած Երևանում են, տղան երկար տարիներ Ռուսաստանում է։ Նրա հետ շփվածներից երկու-երեք ընտանիքի ներկայացուցիչներ են մեկուսացվել»,- ասաց Գևորգյանը։

Այս դեպքը Մարալիկում  առաջինն էր: Այն որոշ խուճապային տրամադրություններ է ստեղծել, սակայն, համայնքի ղեկավարի խոսքով, խուճապի մատնվել պետք չէ, պարզապես պետք է հետևել պարետի որոշումներին։

Համայնքում, ըստ Արտակ Գևորգյանի, իրականացվում են բոլոր կախարգելիչ միջոցառումները:

«Շաբաթը  մի քանի անգամ իրականացվում է բազամաբնակարան բնակելի շենքերի շքամուտքերի ախտահանում ժավելաջրով, նաև փողոցների լվացում քլորաջրով։ Այսօր արդեն սկսել ենք լվացումները բազմաբնակարան բնակելի շենքերի մուտքերի բակերում, շքամուտքերի հատվածում և հանրային վայրերում։ Մեր խոշոր բնակավայրերից Սառնաղբյուրում, Ձորակապում, Քարաբերդում ևս ժամանակ առ ժամանակ իրականացվում են աշխատանքներ։ Խոշորացված մնացած բնակավայրի վարչական ղեկավարները ևս ապահովված են առաջին անհրաժեշտության բոլոր պարագաներով, որոնք պետք են ախտահանման համար»,- նշեց նա:

Գևորգյանը նաև հավելեց, որ տեղաշարժի սահմանափակումներին բնակիչները հիմնականում ենթարկվում են։

«Իհարկե, կան մարդիկ, որոնք ավելի ակտիվ են, բայց, ամեն դեպքում, ինքնամեկուսացման պրոցեսը պահպանվում է։ Որոշակի դժվարություն են ներկայացնում գարնան գյուղատնտեսական աշխատանքները, բայց ինչ-որ տեղ եղանակը հիմա նպաստավոր չէ, անձևային է, այդ պատճառով բնությունը ևս նպաստում է, որ մարդիկ ինքնամեկուսացման ռեժիմին ենթարկվեն»,- ասաց Անի խոշորացված համայնքի ղեկավարը։

Էմմա Չոբանյան