Հասարակություն
03.04.2020 | 13:57
Վրաստանի մայրաքաղաք Թբիլիսիում կորոնավիրուսի դեմ տարվող պայքարի լուսանկարները համացանցում մեծ տարածում են գտել: Հսկայածավալ աշխատանք է տարվում՝ քաղաքի փողոցներն ախտահանելու համար:
Լուսանկարներից մեկը իր էջում հրապարակել է Երևանի ավագանու իշխանական «Իմ քայլը» խմբակցության անդամ Դավիթ Խաչատրյանը և հեգնել. «Թբիլիսին լվանում է փողոցները վիրուսից, դրան հետևելու է մետրոյի և երկաթգծի ռելսերի ախտահանումը, այնուհետև Թբիլիսի-Բաթումի մայրուղին, Փոթիի նավահանգստի ափամերձ ջրերը և ՌԴ-ՀՀ գազատարի խողովակները, իսկ վերջում կառուցվելու է հզոր ժամանակակից քամու գործարան, որ փչի ու վրացական հողերից քշի տանի էդ չարիքը»:
Ավագանու ընդդիմադիր «Լույս» խմբակցության անդամ Թեմինա Վարդանյանն էլ, նույն լուսանկարը հրապարակելով, ընդգծել է, թե Երևանում ինչպես է իրականացվում ախտահանումը:
«Ծանոթացեք. Թբիլիսի, մեր օրեր, ախտահանում… Մենք, ինչ խոսք, ավելի լավ ենք ախտահանում, քան Թբիլիսիում: Հո սենց ծավալով աշխատանքներ չենք անի: Պատուհան լվանալու փչիկն ամբողջովին բավարար է: Համ էլ քաղաքապետը մի անգամ արդեն ուղերձ է հղել ու ասել՝ որը որից հետո է: Չեմ հասկանում՝ էլ ի՞նչ անի էդ մարդը: Հո չի՞ աշխատի: Շատ անշնորհակալ ենք, է, շաաատ: Չենք գնահատում քաղաքի պաշտպանության պետի ջանքերը: Իսկ եթե ավելի լուրջ, ամոթ ու ևս մեկ անգամ ամոթ, եթե դեռ էդպիսի հատկություն ունեք: Հուսով եմ՝ նայելուց գլուխներդ կկախեք: Չնայած «ՀՀ հպարտ քաղաքացի» եզրույթը կա ու կա, որը պատեհ-անպատեհ օգտագործելով, թոզ փչելով՝ ման եք գալիս»,- գրել է նա:
Այնուհանդերձ, նշենք, որ Երևանի քաղաքապետարանի մամուլի խոսնակ Հակոբ Կարապետյանը մի քանի օր առաջ տեղեկացրել էր, որ մայրաքաղաքում ամեն օր ախտահանվում է հանրային տրանսպորտը:
Ի դեպ, այս պահին Հայաստանում կորոնավիրուսով վարակվածների թիվը 736 է, բուժվածներինը՝ 43, գրանցվել է 7 մահ: Իսկ Վրաստանում գրանցվել է վարակման 148 դեպք, առողջացել է 23-ը, մահեր չեն եղել:
Նարեկ Կիրակոսյան
