Քաղաքականություն
28.03.2020 | 22:47
Այսօր Ադրբեջանում կորոնավիրուսով վարակման 17 դեպք է գրանցվել, 1 հիվանդ էլ մահացել է: Այս մասին հաղորդում է Ադրբեջանի Նախարարների կաբինետի օպերատիվ շտաբը։
Ադբեջանում կորոնավիրուսով վարակված արդեն 4-րդ հիվանդն է մահանում։ Հաղորդվում է, որ այսօր մահացածը ծնվել է 1951թ-ին, ունեցել է մի շարք հիվանդություններ, այդ թվում՝ սրտի հիվանդություն, շնչահեղձություն, շաքարային դիաբետ։ Նրան կորոնավիրուսի թեստ են արել, որը դրական է եղել։ Հիվանդի վիճակի կայունացման ռեանիմացիոն բոլոր գործողություններն արդյունք չեն տվել, և նա մահացել է։
Այս պահին Ադրբեջանում կա կորոնավիրուսով 163 հիվանդ, որոնք հատուկ ռեժիմի հիվանդանոցներում են։ Նրանցից 23-ը ծայրահեղ ծանր վիճակում է, 17-ը՝ միջին ծանրության, իսկ մյուսների վիճակը կայուն է։
Ընդհանուր առմամբ, Ադրբեջանում գրանցվել է կորոնավիրուսով վարակի 182 դեպք, կատարվել է 25.000 թեստ։
Նշենք նաև, որ կորոնավիրուսի տարածման վտանգով պայմանավորված՝ Ադրբեջանում մտցված է հատուկ կարանտինային ռեժիմ, որը մարտի 29-ից ավելի է խստացվելու։ Սահմանափակումներն ավելի խստացվելու են, մասնավորապես՝ Բաքվի մետրոն աշխատելու է օրվա ընթացքում ընդամենը մի քանի ժամ՝ առավոտյան ժամը 07։00- 09։00 և երեկոյան՝ ժամը 17։00-20։00-ն, ամբողջովին փակվում են սրճարանները, ռեստորանները ու հանրային սննդի այլ օբյեկտները, միայն թույլատրվելու է առաքումը։ Բացի այդ՝ արգելված է 65 և ավելի բարձր տարիք ունեցեղներին տանից դուրս գալ։
Էմմա Չոբանյան
