Թուրքիան միանման բեղերի պետության է վերածվում. Կարո Փայլան

Թուրքիայի ընդդիմադիր «Ժողովրդադեմոկրատական կուսակցության» անդամ, խորհրդարանի հայ պատգամավոր Կարո Փայլանը ծաղրել է «բեղավոր թուրք պաշտոնյաներին». տեղեկացնում է ermenihaber-ը:

Թուրքիայի խորհրդարանում բյուջեի նախագծի քննարկման ժամանակ ելույթ ունենալիս Փայլանը  քննադատել է այն հանգամանքը, որ բյուջեի հանձնաժողովի բոլոր անդամները տղամարդիկ են, իսկ պաշտոնյաների մեծ մասը բեղեր են պահում Էրդողանին հաճոյանալու համար:

«Ձեր ասած պետությունը,  տղամարդկանց պետությունն է: Բացի այդ այս երկու տարվա մեջ մի զարգացում էլ ունենք. Երկիրը գնալով միանման բեղերի երկրի է վերածվում: Կարծես թե պաշտոնին մնալ ցանկացողները հարկադրված են այդպիսի բեղեր ունենալ: Եթե նայենք 2 տարի առաջվա պատկերին, բեղ ունեցողները ընդամենը 5-10% էին կազմում,  իսկ ներկայումս նրանց թիվը հասել է 90-95 %-ի:  Բեղը դիտվում է, որպես ուժերի համախմբան խորհրդանիշ»,- ասել է Փայլանը:

Նշենք, որ ավելի վաղ «Associated Press» գործակալությունը փոքրիկ հետաքննություն էր անցկացրել՝ պարզելով, որ թուրք նախարարները բեղեր են պահում նախագահ Էրդողանի խորհրդով: Գործակալության տվյալներով՝ մեկ տարի առաջ Թուրքիայի նախարարների կաբինետի անդամների մեծ մասը սափրված էր: Հիմա թուրք 27 նախարարներից միայն երեքը բեղ չունեն: Նախարարներից մեկը գործակալությանը հայտնել է, որ որոշ բարձրաստիճան պաշտոնյաներ սկսել են բեղեր աճեցնել Էրդողանի խորհրդով: Որոշ վերլուծաբանների կարծիքով, սա պատահականություն չէ, քանի որ խոսքը մի երկրի մասին է, որտեղ դեմքի մազածածկույթը վաղուց քաղաքական նշանակություն ունի: Նախագահի ոճը կրկնօրինակելով՝ Էրդողանի աջակիցները եւ իշխող կուսակցության անդամները, կարծես, փորձում ենհարմարվել նրա թիմում: