25.04.2026 | 13:54
Վաշինգտոնում, Չարլզ III թագավորի այցից առաջ, սխալմամբ Բրիտանական դրոշի փոխարեն կախել են Ավստրալիայի դրոշը
Շիրակի մարզում կորոնավիրուսի դեպքեր ու վարակակիրներ չկան
16.03.2020 | 14:14
Շիրակի մարզում այս պահին կորոնավիրուսով վարակակիրներ ու մտահոգիչ դեպքեր չկան։ Այս մասին Factor.am-ի հետ զրույցում հայտնեց Շիրակի մարզպետարանի առողջապահության ու սոցիալական ապահովության վարչության պետի ժամանակավոր պաշտոնակատար Լեյլի Ասլանյանը։
«Չկա ոչ մի մտահոգիչ դեպք, մենք արտակարգ ռեժիմով աշխատում ենք։ Ունենք հսկողության տակ վերցված անձինք։ Ահագին մարդիկ արդեն կարանտինից դուրս են եկել, իհարկե, նաև մտնում են կարանտին։ Այս պահին թիվը հստակեցման փուլում է, բայց մտահոգիչ ոչինչ չունենք։ Օպերատիվ ռեժիմով աշխատում ենք, մարզում ստեղծվել է օպերատիվ շտաբ, համակարգում ենք ՀՎԿԱԿ-ի, տեսչական մարմնի հետ, ինչպես նաև օպերատիվ աշխատում ենք մեր բոլոր բուժհաստատությունների հետ»,- ասաց Լեյլի Ասլանյանը։
Համապատասխան աշխատանքներ ու վերահսկողություն է տարվում նաև «Շիրակ» օդանավակայանում ու Բավրայի անցակետում։
«Կան պատկան մարմիններ, որոնք իրականացնում են հսկողություն, սահմանակետում կան մասնագետներ և՛ ՀՎԿԱԿ-ից, և՛ տեսչական մարմնից։ Իրենք հսկողություն են իրականացնում, և եթե կան այնպիսիք, որոնց պետք է վերցնել կարանտինային հսկողության տակ, փոխանցում են մեզ»,- նշեց մարզպետարանի պաշտոնյան:
Շիրակի մարզպետ Տիգրան Պետրոսյանն էլ նախօրեին ֆեյսբուքյան գրառմամբ հայտնել էր, որ ռիսկային երկրներից օրերս վերադարձած մեկ երիտասարդի տեղափոխել են Երևան՝ նմուշառումն այնտեղ իրականացնելու համար։
Լեյլի Ասլանյանը տեղեկացրեց, որ երիտասարդի նմուշառման պատասխանը դեռ չունեն:
Էմմա Չոբանյան
