Հասարակություն
11.03.2020 | 21:08
Առողջապահության համաշխարհային կազմակերպությունը (ԱՀԿ) նոր տեսակի կորոնավիրուսը համաշխարհային համաճարակ է հայտարարել։
Կազմակերպության գլխավոր տնօրենը կոչ է արել կառավարություններին առավել համակարգված և արդյունավետ քայլեր ձեռնարկել՝ սեփական քաղաքացիների առողջությունը պահպանելու համար:
Քիչ առաջ էլ վարչապետ Նիկոլ Փաշինյանն իր ֆեյսբուքյան էջում տեղեկացրեց, որ Հայաստանում կորոնավիրուսով վարակման 3 նոր դեպք է արձանագրվել։
«Երկու հոգին ՀՀ քաղաքացի են (45 եւ 27 տարեկան), մեկը՝ Իտալիայի (51 տարեկան), ով աշխատում է Հայաստանում: Երեքն էլ ժամանել են Իտալիայից: Հիմա մեկուսացնելու համար պարզաբանվում է նրանց շփման շրջանակը, որը, ըստ նախնական տվյալների, մեծ չէ։ Իտալիայի քաղաքացին և ՀՀ քաղաքացիներից մեկը գանգատներ չունեն։ ՀՀ քաղաքացիներից մեկը թոքաբորբ է տանում: Պացիենտները ժամանելուն պես հաշվառված են եղել»,- տեղեկացրել է վարչապետը։
Վերջին տվյալներով՝ աշխարհի 114 երկրում նոր տեսակի կոորանվիրուսով 118 հազար մարդ է վարակվել: Մահացությունների թիվը գերազանցում է 4.000-ը։
Նշենք, որ պանդեմիա է համարվում անսովոր հզոր համաճարակը, որը բնութագրվում է ինֆեկցիոն հիվանդության՝ աշխարհի բազմաթիվ երկրներում տարածմամբ:
Նելլի Մելքոնյան
