Խուճապային գնումներ, խուճապային կոչեր և հայտարարություններ պետք է չլինեն. վարչապետի հորդորը. ՏԵՍԱՆՅՈՒԹ

Հայաստանում ունենք որոշակի անհրաժեշտ ապրանքների դեֆիցիտ, մասնավորապես՝ դիմակների դեֆիցիտ, բայց այդ պրոբլեմը ոչ միայն մեր երկրում է, այլև ամբողջ աշխարհում: Կորոնավիրուսի տարածումը կանխարգելող աշխատանքային խմբի նիստին այս մասին հայտարարեց ՀՀ վարչապետ Նիկոլ Փաշինյանը։

«Հիմա նույնիսկ մենք ստացանք տեղեկություններ, որ կան գործարարներ, ընկերություններ, որոնք պատրաստ են ներկրել դիմակներ, բայց քանի որ աշխարհում գների բարձրացում է տեղի ունեցել, նրանք մտավախություններ ունեն, որ ներսում իրենց կմեղադրեն սպեկուլյատիվ գնագոյացման մեջ: Բայց Տնտեսական մրցակցության պաշտպանության պետական հանձնաժողովն աշխատում է նրանց հետ, և մենք պետք է աշխատենք, որ օբյեկտիվ գին լինի մեր շուկայում դիմակների համար: Բայց մենք պետք է հասկանանք, որ ամբողջ աշխարհում գները բարձրացել են, հետևաբար, նոր խմբաքանակները հայտնվելիս, ենթադրում ենք, որ շուկայում գնի որոշակի բարձրացում կարձանագրվի»,- ասաց վարչապետը:

Նիկոլ Փաշինյանը հորդորեց խուճապային իրավիճակ չստեղծել. «Հիմնական միջազգային և հայ հանրության, մեր բոլորիս արձանագրումը՝ կորոնավիրուսի ամենամեծ վտանգը խուժապն է: Այսինքն՝ ոչ թե կորոնավիրուսն է պրոբլեմը, այլ այն խուճապը, որ դրա անունը լսելիս մարդկանց շրջանում առաջացնում է: մեր հիմնական խնդիրը հետևյալն է՝ Հայաստանում որևէ պարագայում խուճապ, խուճապային գնում, խուճապային տեղաշարժ, խուճապային հայտարարություններ, խուճապային կոչեր պետք է չլինեն: Սրա համար կառավարությունը պիտի դառնա նման խուճապի բացակայության երաշխավորը, և դրա երաշխիքն այն է, որ բացառվում է, որ մենք Հայաստանի Հանրապետության քաղաքացիներից թաքցնենք որևէ տեղեկատվություն»:

Մանրամասները՝ տեսանյութում: