Ինչու չփակվեց Իրանի հետ սահմանը. մեկնաբանում է Արսեն Թորոսյանը. ՏԵՍԱՆՅՈՒԹ

Կորոնավիրուսով վարակված ՀՀ քաղաքացին մեկուսացված պայմաններում հիվանդանոցում նստած է և որևէ բուժական միջամտություն չի իրականացվում։ Այս մասին այսօր՝ մարտի 1-ին, Հայաստանում կորոնավիրուսի հայտնաբերման առաջին դեպքի առնչությամբ հրավիրված ասուլիսի ժամանակ ասաց առողջապահության նախարար Արսեն Թորոսյանը։

«Մենք երեկ կորոնավիրուսով վարակվածության հաստատված դեպք ենք ունեցել մեր քաղաքացու մոտ, որը վերադարձել է Իրանի Իսլամական Հանրապետությունից ամսի 28-ին։ Վերջին տվյալներով՝ մեր քաղաքացին որևէ ախտանշան չունի, չնայած դիմելու պահին ունեցել է 38 աստիճան ջերմաստիճան և դրա պատճառով է փաստացի դիմել բժշկական հաստատություն: Նրա հետ է նրա կինը, որը նույնպես որևէ ախտանշան չունի: Կնոջ մոտ նույնիսկ վիրուսի առկայությունն է բացասական: Ինչպես հիշում եք, ամսի 24-ին կառավարության արտահերթ նիստում որոշում ընդունվեց սահմանափակել Իրանի Իսլամական Հանրապետության հետ ուղևորաշրջանառությունը, որոշակի բացառություններ սահմանելով Հայաստան վերադարձող ՀՀ քաղաքացիների համար և Իրան վերադարձող Իրանի քաղաքացիների համար: Հատուկ եմ այս հանգամանքը նշում, որովհետև հաճախ լսում եմ, թե ինչի չփակվեց սահմանը ու միանգամից պատասխանում եմ, որ նույնիսկ ՀՀ սահմանդրությամբ ՀՀ քաղաքացիների մուտքը Հայաստան չի կարող սահմանափակվել և ոչ միայն օրենքներով, այլ ընդհանրապես մարդասիրության ու հայրենիքի կողմից հոգածության սկզբունքներով չի կարող արվել»,- ասաց նախարարը:

Մանրամասները՝ տեսանյութում։

Լիլիթ Շաբոյան