ՀՔԾ-ն՝ Միքայել Մինասյանի Հայաստան գալու մասին

Սերժ Սարգսյանի փեսա, Վատիկանում Հայաստանի նախկին դեսպան Միքայել Մինասյանը Հայաստան չի վերադարձել: Այս մասին Factor.am-ի հարցին ի պատասխան փոխանցեցին Հատուկ քննչական ծառայությունից:

Հիշեցնենք, որ տպագիր մամուլը գրել էր, որ օրերս մի քանի օրով Հայաստան է ժամանել Սերժ Սարգսյանի փեսա Միքայել Մինասյանը:

Միքայել Մինասյանը, որը իշխանափոխությունից հետո պաշտոնանկ եղավ, այժմ  դարձել է Նիկոլ Փաշինյանի կառավարության սուր քննադատներից մեկը: Նախորդ տարի սեպտեմբերի 18-ին Վանաձորում հրավիրված մամուլի ասուլիսի ժամանակ Նիկոլ Փաշինյանը, պատասխանելով Factor.am-ի հարցին, ակնարկել էր, որ Միքայել Մինասյանը սեփականաշնորհել է երկրի համար ստրատեգիական նշանակություն ունեցող օբյեկտ: Ինչպես հետագայում մամուլը գրեց՝ խոսքը Լոռու մարզում գտնվող «ՁորաՀԷԿ» հիդրոէլեկտրակայանի մասին է:

Իսկ ահա ԱԱԾ նախկին տնօրեն Արթուր Վանեցյանը հրաժարականի հաջորդ օրը՝ 2019-ի սեպետմեբրի 17-ին Factor.am-ին տված հարցազրույցում ասաց․ «Միքայել Մինասյանն իմ համար մարդ է, որը դեռ պետք է շատ հարցերի պատասխան տա Հայաստանի Հանրապետության օրենքների առջև»:

Վանեցյանի և Փաշինյանի՝ իրեն վերագրվող հայտարարություններին անդրադարձել էր նաև Միքայել Մինասյանը, նա ֆեյսբուքյան իր էջում գրել էր. «Հետևում եմ Արթուր Վանեցյան/ Նիկոլ Փաշինյան էպոպեային: Նայում եմ ԱԱԾ նախկին ղեկավարի վերջին հարցազրույցը: Չգիտեմ, թե օրենքի առաջ այդ ինչ «շատ հարցերի» պիտի պատասխանեմ ես, որովհետև ձևակերպված իրավական հարցերի գոյության մասին տեղյակ չեմ, և դրանք, որպես այդպիսիք, ուղղակի չկան: Փոխարենը կան անպատասխանատու հայտարարություններ և ջղաձիգ հրապարակային «հանձնարարականներ»: Բայց այս թեմայով ավելի ուշ կխոսենք»:

Ի դեպ, այսօր տեղի ունեցավ երրորդ նախագահ Սերժ Սարգսյանի գործով առաջին դատական նիստը: Նա մեղադրվում է պետական միջոցների յուրացման մեջ: Սերժ Սարգսյանի աջակիցները բողոքի ակցիա էին իրականացնում դատարանի բակում, որին ներկա էր նաև նրա  փեսաներից մեկը միայն՝ Հայկ Խաչատրյանը:

Նարեկ Կիրակոսյան