ORSIS-ի հետ կապված նոր քրեական գործով անցնող ՊՆ փոխնախարարը Մակար Ղամբարյանն է․ նա իր առնչությունը հերքում է

Factor.am-ը քիչ առաջ գրել էր, որ Հատուկ քննչական ծառայությունում Ռուսական ORSIS ընկերության հետ կապված նոր քրեական գործ է հարուցվել:

Factor.am-ի տեղեկություններով՝ գործով անցնում է ՊՆ բարձրաստիճան պաշտոնյա՝ փոխնախարարներից մեկը:

Մեր տեղեկությունների համաձայն՝ ՀՔԾ-ն նոր քրեական գործը հարուցել է ՀՀ պաշտպանության նախարարության բարձրաստիճան պաշտոնյայի կողմից արժեքավոր նվեր յուրացնելու և երկրում ORSIS-ի շահերը ներկայացնող փաստաբանի աշխատանքը խոչընդոտելու փաստերով:

Պաշտպանության նախարարության և Հատուկ քննչական ծառայության մեր հավաստի աղբյուրները փոխանցեցին, որ խոսքը ՊՆ փոխնախարար Մակար Ղամբարյանի մասին է:

ՊՆ փոխնախարար Մակար Ղամբարյանը, Factor.am-ի հետ զրույցում անդրադառնալով այս թեմային, ասաց. «Չեմ ցանկանում մեկնաբանել այն ընթացքը, ինչ-որ այս պահին իրականացվում է: Միայն կասեմ, որ այն ինչ ասում եք՝ իրականությանը չի համապատասխանում: Ես վստահ եմ, որ ամբողջական տեղեկատվությունը իրավապահները իրենց աշխատանքի ավարտին կհրապարակեն: Ես վստահում եմ մեր իրավապահներին»:

Հստակեցնող հարցին՝ երաշխավորում է, որ երբ իրավապահներն ավարտեն իրենց աշխատանքերը, պարզ կլինի, որ ինքն առնչություն չունի գործի հետ, փոխնախարարն արձագանքեց․ «Ինչ է նշանակում երաշխավորում եք, որ Ձեր անունը չենք տեսնի այնտեղ: Ես հետևյալն եմ երաշխավորում, որ իրականության հետ կապ չունի: Իսկ թե ինձ հետ կապ ունի՝ դա ասացի, որ չեմ ցանկանում մեկնաբանել»:

Հիշեցնենք, որ ՀՀ պաշտպանության նախարարությունն այս տարվա մայիսին չեղարկել է ռուսաստանյան ORSIS ընկերության կողմից 1,9 միլիոն դոլարի Dedal-T2.380 Hunter LRF ֆիրմայի գիշերային տեսադիտման հատուկ սարքերի մատակարարման գործընթացը: Ինչպես պաշտպանության նախարարության մեր աղբյուրն էր փոխանցել և հետագայում էլ հաստատել էր անձամբ նախարար Դավիթ Տոնոյանը, գործարքի չեղարկման պատճառը եղել է ռազմականի փոխարեն որսորդական տեսադիտման հատուկ սարքերի մատակարարման փորձը:

ORSIS ընկերության երևանյան «Օրսիս Արմս» ՍՊԸ-ն այս տեղեկությունները հերքում է:

Նարեկ Կիրակոսյան