20.02.2026 | 16:46
ՀՀ փոխվարչապետն ու Վրաստանի էկոնոմիկայի նախարարն անդրադարձել են «Խաղաղության խաչմերուկ» նախաձեռնությանը
Երբեմն ուզում եմ երիտասարդ տարիքի այս կամ այն թռիչքին մի հատ էլ հասնեմ․ Տիգրան Մանսուրյան
27.01.2020 | 17:32
Եթե անկեղծ լինեմ, պետք է խոստովանեմ, որ երբեմն ուզում եմ երիտասարդ տարիքի այս կամ այն թռիչքին մի հատ էլ հասնեմ։ Այս մասին լրագրողների հետ հանդիպման ժամանակ ասաց մաեստրո Տիգրան Մանսուրյանը։ Այսօր կոմպոզիտորը նշում է ծննդյան 81 ամյակը։
Նա, անդրադառնալով հարցին, այս փուլում ի՞նչ ստեղծագործական աշխատանքի վրա է կենտրոնացած, պատասխանեց, որ շատ ծանր մի գործի հետ է կապված, որն աշնանը պետք է հնչի Իտալիայում։
«Իտալիայի 3 քաղաքներում պետք է հնչի։ Շատ մտահոգ եմ էս գործի որակի հետ կապված։ Այս գործը մինչև մարտի վերջ պետք է վերջացնեմ»,- նշեց Տիգրան Մանսուրյանը։
Մաեստրոն տեղեկացրեց, որ նոր է վերադարձել Չեխիայից։ Բռնո քաղաքում 2 օր հնչել է նրա ստեղծագործություններից «Ռեքվիեմը»։ «Այն շատ է հնչել աշխարհի տարբեր մայրցամաքներում՝ Հարավային Ամերիկա, Հարավային Կորեա, Եվրոպա, Ռուսաստան և Հայաստան։ Չեխիայում Հայաստանի դեսպան Աշոտ Հովակիմյանն իր ընտանիքի հետ 2 օրերին ներկա եղավ, շատ հոգատար էր։ Լավ բան է, երբ պետությունը քո գլխին է, մանավանդ օտարության մեջ»,- նշեց նա։
Մանսուրյանը նաև տեղեկացրեց, որ այս տարի մշակութային իրականությունը տոնելու է Դանթե Ալիգերիի «Աստվածային կատակերգություն» ստեղծագործության ստեղծման 700-ամյակը, և առաջարկ է եղել գրել երաժշտություն «Քավարան» հատվածի համար։
«Առաջարկել են, որ երեք հեղինակներից ամեն մեկը գրի մի հատվածը։ Ինձ առաջարկել են «Քավարանը», և ես համաձայնեցի»,- ասաց Մանսուրյանը։
Իսկ թե ինչպե՞ս է պատրաստվում տոնել իր ծննդյան օրը, նշեց․ «Սովորական օր է, երեկոյան մտերիմների խմբով կհավաքվենք, մի քիչ կխոսենք, մի քիչ կենաց կբարձրացնենք»։
Արմինե Ալոյան
