Ո՞ր դեպքում կբացառվի պոլիէթիլենային տոպրակի արգելքը. Շրջակա միջավայրի փոխնախարարը պարզաբանում է. ՏԵՍԱՆՅՈՒԹ

Բավականին լայն աշխատանքներ ենք իրականացրել։ Հանդիպումներ ենք ունեցել բոլոր շահագրգիռ կողմերի հետ․ պլաստիկ տոպրակների արտադրողների, սուպերմարկետների, ռեստորանների ներկայացուցիչների, ինչպես նաև բազմակի օգտագործման տոպրակների մշակույթի ներդրման մեջ ընդգրկված հասարակական կազմակերպությունների հետ։ Գտանք այն մոդելը, որը, կարծում ենք, ամենաարդյունավետը կլինի Հայաստանում։ Այս մասին այսօր լրագրողների հետ զրույցում նշեց Շրջակա միջավայրի նախարարի տեղակալ Իրինա Ղափլանյանը՝ անդրադառնալով երեկ կառավարության նիստում ընդունված «Առևտրի և ծառայությունների մասին ՀՀ օրենքում լրացումներ կատարելու մասին» օրենքի նախագծին, ըստ որի՝ 2022 թվականի հունվարի 1-ից Հայաստանում կարգելվի պոլիէթիլենային տոպրակների օգտագործումը։

«Դեռ 2018 թվականի հուլիսին Շրջակա միջավայրի նախարար Էրիկ Գրիգորյանը հայտարարեց, որ սկսում ենք պլաստիկի փուլային նվազեցում։ Մեր կառարավարության և համապատասխան լիազոր մարմնի առաջիկա տեսլականի և ռազմավարության մեջ դրված է՝ Հայաստանում ստեղծել շրջանակային տնտեսության հիմքերը, որի մեջ ընդգրկված է նաև հնարավորինս նվազեցնել այն աղբի ծավալները, որոնք այսօր Հայաստանում կուտակվում են»,- ասաց Շրջակա միջավայրի նախարարի տեղակալը։

Նրա տեղեկացմամբ՝ օրենքի նախագծով նաև բացառություններ կլինեն։

«Բացառություն ենք դրել կշռափաթեթավորման պարկերի համար։ Սա կարևոր է այն առումով, որ ոչ միայն հայկական շուկայում, այլ նաև ԵՄ երկրներում դեռ չկա այլընտրանք։ Կշռափաթեթավորման համար նախատեսվող ամենաբարակ պոլիէթիլենը սննդի անվտանգության տեսակետից կարևոր է և այս մասով դեռ կարգավորում չկա նաև մեր հարևան ԵՄ գործընկեր երկրներում։ Երկրորդ բացառությունն աղբի համար նախատեսված տոպրակներն են»,- ասաց Իրինա Ղափլանյանը։

Մանրամասները՝ տեսանյութում։

Նելլի Մելքոնյան