Սերժ Սարգսյանը կեղծում է իրականությունը, նրա ելույթը պոպուլիզմի անհաջող փորձ է․ Ստյոպա Սաֆարյան. ՏԵՍԱՆՅՈՒԹ

Երեկ Սերժ Սարգսյանը ԵԺԿ համագումարում կոշտ քննադատության է ենթարկել Նիկոլ Փաշինյանի իշխանությանը։ Ասել է, թե Հայաստանում վտանգված է ժողովրդավարությունը, իրականացվում են քաղաքական հետապնդումներ, պարբերական են դարձել ագրեսիվ գործողությունները ակտիվիստների ու ընդդիմադիր լրատվամիջոցների նկատմամբ, խախտված է դատական իշխանության անկախությունը, չի գործում իշխանությունների տարանջատման և հավասարակշռության սկզբունքը։

«Անցյալ տարի ես հեռացա, որպեսզի իմ ժողովուրդը փորձի է՛լ ավելի լավ պետություն կառուցել: Սակայն այսօր արդեն ավելի ու ավելի հնչեղ են դառնում այն մարդկանց ձայները, ովքեր ինձ մեղադրում են իշխանությունը պոպուլիստներին զիջելու մեջ: Հեղափոխության անվան տակ իշխանության եկածները իրականության մեջ անցած մեկուկես տարվա ընթացքում որևէ հեղափոխական փոփոխություն կամ երկրի արտաքին ու ներքին օրակարգերի հեղափոխական բեկում չեն մտցրել»,- ասել է երրորդ նախագահը։

«Իրականում Սերժ Սարգսյանի ելույթը պոպուլիզմի անհաջող փորձ է՝ տուրք տալով ամբոխահաճությանը՝ խտացրել է գույները»,- կարծում է քաղաքագետ Ստյոպա Սաֆարյանը։

Երրորդ նախագահը պարզապես փորձել է շահել Հայաստանում փոփոխություններից դժգոհողների համակրանքը։

«Հայաստանում չկա քաղաքական հետապնդում, Հայաստանում կան ձերբակալված հանցագործներ, որոնք մեղադրվում են կամ կոռուպցիոն խայտառակ մեծ հանցագործությունների մեջ, կամ մարդկանց կյանքին, գույքին սպառնալու և այլ հանցանքների մեջ։ Հայաստանում չկա ընդդիմադիր լրատվամիջոցների նկատմամբ հետապնդում։ Եթերի մեծ մասը զբաղեցված է նախկին իշխանություններին սպասարկող հեռուստաընկերություններով։ Դատական իշխանության մի մասը շարունակում է սպասարկել նախկին իշխանություններին։ Մարդիկ, ովքեր մեղադրվել են հանցագործությունների մեջ, երբ նրանց նկատմամբ մեղադրանք է առաջադրվել, հաջողացրել են դատական իշխանության և իրավապահների կապերի միջոցով հայտնվել սահմաններից դուրս»,- ասում է քաղաքագետը։

Մանրամասները՝ տեսանյութում:

Ռոբերտ Անանյան