Ազատ ստեղծագործողը Հայաստանում տեղ չունի․ դահլիճների գները բարձրացել են, համերգ կազմակերպող արվեստագետներն աշխատում են վնասով

Արվեստագետներն ահազանգում են, որ պետական մշակութային կառույցների դահլիճների վարձակալության գինը վերջին մեկ տարվա ընթացքում կտրուկ բարձրացել է: Օրինակ` մեկ օրով Երևանի պետական տիկնիկային թատրոնի մեծ դահլիճի վարձակալությունը նախկինում արժեր 120 հազար դրամ, այժմ` 250 հազար դրամ, Կոմիտասի անվան կամերային երաժշտության տան դահլիճինը՝ նախկինում՝ 106 հազար դրամ, այժմ՝ 250 հազար դրամ։

Մշակույթի փոխնախարար Արթուր Պողոսյանը Factor.am-ի հետ զրույցում չհերքեց` պետական դահլիճների վարձակալության գներն իսկապես բարձրացել են: Նրա խոսքով` գները վերանայվել են նախարար Արմեն Ամիրյանի հրամանով։ Այդպիսով կանոնակարգում են համերգասրահի տնօրեն-նախարարություն-շահառու հարաբերությունները:

Պարզվում է՝ եթե միջոցառումը Մշակույթի նախարարության հովանավորությամբ է կազմակերպվում, վարձակալության գինը զեղչվում է, օրինակ` Օպերային թատրոնի դահլիճի վարձակալության գինն այդ դեպքում 1,5 միլիոնից իջնում է 1 միլիոն 200 հազար դրամի, Երևանի պետական տիկնիկային թատրոնի մեծ դահլիճինը`250 հազար դրամից իջնում է 100 հազար դրամի:

Երգիչ, երգահան Վահան Արծրունին այստեղ տեսնում է դաշտը յուրայինների և ոչ յուրայինների բաժանելու վտանգ։ Արթուր Պողոսյանը տեղեկացնում է, որ տնօրեններին դահլիճների վարձակալության սակագնի սահմանման հարցում տրված է կոմերցիոն ազատություն՝ վարձակալի համար ֆիքսված գնից ցածր գին նրանք սահմանել չեն կարող, բայց ահա բարձր՝ կարող են։ Վահան Արծրունին չի հասկանում՝ ինչով է պայմանավորված այդ ազատությունը։ Երգահանը շեշտում է, որ մեր երկրում գոյություն չունի օրենք, որը կկարգավորեր պետության հետ ազատ ստեղծագործողի հարաբերությունները։ Սա, նրա համոզմամբ, բավական մեծ բացթողում է։

Այս պայմաններում հարց է ծագում՝ ինչպե՞ս պետք է դրսևորվի ազատ արվեստագետը, ի՞նչ միջոցներով պետք է նա իրականացնի իր համերգը, և ամենակարևորը՝ ինչ մղումներով:

Մանրամասները՝ տեսանյութում։

Աննա Բաբաջանյան