21.05.2026 | 12:10
Երևանում թնդանոթի կրակոցներ կհնչեն // Օսիպյանը 2 ամսով կալանավորվեց․ ԼՈՒՐԵՐ
Վազգեն Մանուկյանի հրաժարականը պետք է մեզ համար ահազանգ լինի՝ խորհելու համար Հանրային խորհրդի գործունեության նպատակահարմարության մասին. Արման Բաբաջանյան
Քաղաքականություն
13.11.2019 | 19:06
ՀՀ ԱԺ պատգամավոր Արման Բաբաջանյանը ֆեյսբուքյան իր էջում անդրադարձել է Հանրային խորհրդի նախագահ Վազգեն Մանուկյանի հրաժարականին:
«Այսօր հայտնի դարձավ, որ Վազգեն Մանուկյանը որոշում է կայացրել Հանրային խորհրդի ղեկավարի պաշտոնից հրաժարական ներկայացնելու մասին: Պարոն Մանուկյանի որոշումը ողջունելի է, հատկապես եթե հաշվի առնենք, որ նա մեր քաղաքական դաշտի ամենափորձառու գործիչներից է և, վստահաբար, ասելիք ունի քաղաքական կյանքում:
Եվ ի դեպ, հենց քաղաքական չեզոքության պահանջի խախտումն էր, ինչն ինձ ստիպել էր հանդես գալ Վազգեն Մանուկյանի հրաժարականի պահանջով:
Վազգեն Մանուկյանի հրաժարականը, սակայն, պետք է մեզ համար ահազանգ լինի՝ խորհելու համար Հանրային խորհրդի գործունեության արդյունավետության և, եթե հարկ լինի, այդ մարմնի գործունեության նպատակահարմարության մասին ընդհանրապես: Մենք, ըստ էության, այսօր կանգնած ենք երկընտրանքի առաջ՝ կամ Հանրային խորհուրդը դարձնել իսկապես կենսունակ ու արդյունավետ գործող, հանրության և իշխանության մեջ կամրջող դեր ունեցող կառույց, կամ մտածենք սահմանադրական փոփոխությունների ճանապարհով այդ ինստիտուտն ընդհանրապես վերացնելու մասին:
Գոյության իրավունք ունի այն վարկածը, որ Հանրային խորհրդի անարդյունավետ գործունեության պատճառը նրա ղեկավարն էր՝ իր քաղաքական դիրքորոշմամբ ու հայացքներով: Եվ եթե դա այդպես է, նշանակում է՝ մենք պետք է մտածենք իրապես քաղաքականապես չեզոք Հանրային խորհրդի ղեկավար ունենալու մասին, որը կկարողանա ապահովել այդ կառույցի արդյունավետ գործունեությունը: Գոյության իրավունք ունի նաև այն տեսակետը, որ լեգիտիմ իշխանության պայմաններում, ինչպիսին է գործող իշխանությունը, Հանրային խորհուրդը՝ որպես մարմին, ավելորդ է, քանի որ իշխանությունը՝ ժողովրդավարական բոլոր ինստիտուտներով ու կառուցակարգերով, ներկայացնում է հանրային պահանջները:
Սա էլ իր հերթին նշանակում է, որ մենք Հանրային խորհրդի գործունեության նպատակահարմարության հարցը պետք է բերենք քաղաքական օրակարգ և շահագրգիռ քննարկումների միջոցով որոշում կայացնենք: Այս հարցի հետ կապված պետք է իրենց կարծիքն արտահայտեն ինչպես խորհրդարանական, այնպես էլ արտախորհրդարանական ուժերը, երկրի քաղաքական ղեկավարությունը, մտավորականները: Այդ քննարկումների շարքը կարելի է սկսել խորհրդարանից՝ լսումների կամ որևէ այլ ձևաչափով խնդիրը քննարկելու և բոլոր գործոնների հաշվառմամբ վերջնական որոշում կայացնելու համար»,- գրել է նա:
