«Արսեն Բաբայանին անձնական երաշխավորություն ներկայացնելուց առաջ՝ քննարկել եմ քաղաքական թիմի հետ». Սիսակ Գաբրիելյան. ՏԵՍԱՆՅՈՒԹ

«Հայաստանի Հելսինկյան կոմիտե» ՀԿ նախագահ Ավետիք Իշխանյանի և ՀՀ ԱԺ պատգամավոր Սիսակ Գաբրիելյանի անձնական երաշխավորությամբ կալանքից ազատվեց ԱԺ աշխատակազմի ղեկավարի նախկին տեղակալ Արսեն Բաբայանը:

Սիսակ Գաբրիելյանն այսօր լրագրողների հետ զրույցում անդրադառնալով երաշխավորություն ներկայացնելու դրդապատճառներին՝ նշեց, որ Արսեն Բաբայանին ճանաչում է լրագրող աշխատելու տարիներից, ուստի ճանաչելով նրա տեսակը՝ կարծում է, որ կալանքը, որպես խափանման միջոց, պետք է կիրառվի բացառիկ դեպքերում:

«Ինքս դիմել եմ, անձնական երաշխավորություն եմ ներկայացրել և վճարել եմ պահանջվող գումարը՝ կես միլիոն դրամը, իսկ այսօր առավոտյան արդեն ստորագրել եմ համապատասխան երաշխավորությունը: Քիչ առաջ տեղեկացա, որ Դատախազությունն այդ միջնորդությունը բավարարել է: Քննարկումներ եմ ունեցել իրավաբանների հետ, բնականաբար, միանձնյա չեմ ընդունել այս որոշումը, քննարկել եմ քաղաքական թիմիս հետ և, ըստ էության, իրենց դիրքորոշումը համապատասխանում է իմ ներկայացրած միջնորդության հետ: Այստեղ որևէ խնդիր չկա: Իմ խորին համոզմամբ, նա այս փուլում չի կարող խոչընդոտել գործին»,- ասաց պատգամավորը:

Հարցին՝ ի՞նչն է պատճառը, որ կալանքի տակ գտնվող ՀՀ երկրորդ նախագահ Ռոբերտ Քոչարյանի դեպքում անձնական երաշխավորությունը չի կիրառվում, իսկ Արսեն Բաբայանի դեպքում կիրառվեց, Սիսակ Գաբրելյանը պատասխանեց, որ եղել է նախադեպ, երբ Ռոբերտ Քոչարյանն ազատ է արձակվել Արցախի ներկա և նախկին նախագահների անձնական երաշխավորությամբ:

«Ես անձամբ չեմ պատրաստվում անձնական երաշխավորություն տալ Ռոբերտ Քոչարյանի ազատ արձակման համար, քանի որ, բարեբախտաբար, առիթ չեմ ունեցել իր հետ շփվելու, իսկ Արսեն Բաբայանին ճանաչում եմ, և սա նաև իմ անձնական դիրքորոշումն է»,- շեշտեց նա:

Հարցին՝ ճանաչելով Արսեն Բաբայանին՝ ի՞նչ է կարծում՝ նա կարո՞ղ էր փաստաթղթեր կեղծել, Սիսակ Գաբրիելյանը պատասխանեց. «Այո՛, ես ճանաչում եմ նրան, այդ պատճառով էլ այդ հարցին չեմ պատասխանի»:

Մանրամասները՝ տեսանյութում:

Նարեկ Կիրակոսյան