Եթե Նիկոլը չցանկանա, Վազգեն Մանուկյանը հրաժարական չի տա․ Արշակ Սադոյան

Եթե Նիկոլը չցանկանա, Վազգեն Մանուկյանը հրաժարական չի տա։ Այս մասին լրագրողների հետ հանդիպման ժամանակ ասաց Հանրային խորհրդի անդամ, «Ազգային ժողովրդավարների դաշինք» կուսակցության նախագահ Արշակ Սադոյանը:

«Կարծում եմ՝ Վազգեն Մանուկյանն ինքը հենց էնպես հրաժարական չի տա, եթե Նիկոլը չասի: Եթե կառավարությունը չի ուզում աշխատել Հանրային խորհրդի հետ, իմաստ չունի»,- ասաց նա։

Հարցին՝ պետք է մնա՞, թե՞ հեռանա Հանրային խորհրդի նախագահը, պատասխանեց, որ դա կախված է նրանից, թե ինչպիսի փոխհարաբերություններում կլինեն Վազգեն Մանուկյանն ու Նիկոլ Փաշինյանը:

Ապա, խոսելով դատական համակարգից, Արշակ Սադոյանը նշեց, որ անձամբ պահանջելու է, բողոքելու է, որ դատական համակարգն արմատապես վերակառուցվի։

Սադոյանը գտնում է, որ ՍԴ նախագահ Հրայր Թովմասյանը, հանուն անձնական շահի, իր գրածին դեմ գնաց։

«Երբ որ նրան առաջարկեցին, որ Գագիկ Հարությունյանը, թեպետ, 2 ամիս ունի, իրեն կընտրեն Սահմանադրական դատարանի անդամ, հետո նախագահ, և նա մինչև 70 տարեկան կմնա՝ անկախ իր գրած 6 տարվա օրենքից, նա գցեց-բռնեց ու գնաց իր խղճին դեմ։ Հանուն անձնական շահի՝ իր գրածին դեմ գնաց։ Դա անթույլատրելի է, այնտեղ իսկապես «կրիզիս» է»,- ասաց Սադոյանը։

Հանրային խորհրդի անդամն առաջարկում է աշխարհով մեկ ձևավորել ազգ-կազմակերպություն, պետության նման մի կառույց, որի համար հիմա բոլոր նախադրյալները կան։

«Եվ այս խնդիրն է, որ ցավալիորեն չենք կարող պարզել, թե ինչ դիրքորոշում ունի այս հարցի վերաբերյալ Նիկոլ Փաշինյանը և իր թիմը։ Միակ բանը, որ խոսվում է, հայրենադարձությունն է, սակայն հայրենադարձություն կազմակերպելու զանգվածային հնարավորություն իշխանությունը չունի և չի էլ կարող մոտ ապագայում ունենալ»,- նկատեց Ազգային ժողովրդավարների դաշինք կուսակցության նախագահը։

Սադոյանն անդրադարձավ այն հարցերին, թե ի՞նչ է արել Հանրային խորհուրդը, այն մի մարմին է, որ իզուր տեղը ծախս է։

«Հանրային խորհրդի 45 անդամները՝ ներառյալ ես ու խորհրդի նախագահ Վազգեն Մանուկյանը, պետությունից ոչ մի կոպեկ գումար չենք ստանում։ Մենք հասարակական կարգով հանուն հայրենիքի ենք աշխատում։ Իսկ ի՞նչ ենք արել։ Հանրային խորհուրդն ընդամենը խորհրդատվական մարմին է, որը նախկինում խորհուրդներ էր տալիս նախագահին, հիմա էլ Կառավարությանը, վարչապետին, և որի խորհուրդները չեն լսում և՛ այն ժամանակվա, և՛ այսօրվա իշխանավորները։ Հետո ասում են՝ մենք ի՞նչ ենք արել։ Մենք խորհուրդներ ենք տվել, որոնք դուք չեք կատարել»,- եզրափակեց Սադոյանը։

Ա. Ա.