Պետք է այնպես անել, որ մասնավոր սեկտորը մասնակցի գիտության ֆինանսավորմանը․ Ռադիկ Մարտիրոսյան

Գիտության ֆինանսավորումը վիշտ է, որի մասին երկար տարիներ խոսում ենք, բայց, ցավոք սրտի, այն մնում է նույնը։ Այս մասին ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախաձեռնությամբ տեղի ունեցած քննարկման ժամանակ ասաց ԳԱԱ նախագահ Ռադիկ Մարտիրոսյանը։

Նա տեղեկացրեց, որ Սովետական միության փլուզումից հետո որոշվել էր գիտությանը հատկացնել մինիմալ գումար, որով հնարավոր կլիներ պահպանել եղած կառույցները։

«Որոշվեց իրականացնել թեմատիկ ֆինանսավորում, սակայն ֆինանսավորման այս ձևն ուներ բացասական բազմաթիվ կողմեր։ Հետո թեմատիկ ֆինանսավորումից անցանք այն ձևին, որը մինչև հիմա պահպանվում է, դա բազային ֆինանսավորում, նպատակային ֆինանսավորում և թեմատիկ ֆինանսավորումն է։ Պետք է ասել, որ դրական միտում էր, որովհետև հնարավորություն էր տալիս լուրջ ծրագրերը ֆինանսավորել, երկրորդն՝ ունենալ նպատակային ծրագրեր»,- նկատեց Մարտիրոսյանը։

ԳԱԱ նախագահի խոսքով՝ 30 տարի պետության կողմից գիտության ֆինանսավորման ծավալները չեն փոխվել։ Ինչը, նրա կարծիքով, խոսում է այն մասին, որ երբևիցե հատուկ գիտության նկատմամբ պետությունը ոչ մի հոգս չի տարել։

«Նպատակային, կարևոր գիտության այն նշանակությունը, որ գիտությունն ունի անվտանգության, երկրի տնտեսության, ազգի զարգացման կարևորագույն խնդիրների համատեքստում, հատուկ ուշադրություն երբևիցե չի եղել։ Դժվար կլինի գտնել զարգացած մի երկիր, որ այսքան քիչ գումար է հատկացնում գիտությանը»,- ասաց Ռադիկ Մարտիրոսյանը։

Վերջինս նկատեց, որ պետք է այնպես անել, որ մասնավոր սեկտորը մասնակցի գիտության ֆինանսավորմանը ։

«Այս խնդրին է, որի մասին երկար տարիներ խոսում ենք։ Վերջին տարիների ընթացքում մենք բյուջեում չունենք հատուկ գումարներ մեր կառույցների, անշարժ գույքի՝ հիմնականում շենքերի, կառույցների, լաբորատորիաների պահպանման և շահագործման համար։ Բյուջեի 75 տոկոսն աշխատավարձն է, մնացած 25 տոկոսն՝ այլ ծախսեր»,- ներկայացրեց Մարտիրոսյանը։

Անդրադառնալով աշխատավարձերի թեմային՝ Մարտիրոսյանը նշեց, որ անհարմար է աշխատավարձի մասին խոսել՝ համարյա մինիմալ աշխատավարձ է։

«2020 թվականի բյուջեի նախագծի համար ԳԱԱ-ն ներկայացրել է 12-13 ծրագիր, որոնց ֆինանսավորումը, մոտավորապես, 360 մլն դրամ էր, սակայն Պետական կոմիտեն 1 ծրագիր է կարողացել մտցնել բյուջեի մեջ»,- ասաց Մարտիրոսյանը։

Ա․Ա․