Դաժան ծեծի ենթարկված փոխգնդապետի գործով Վայոց Ձորի նախկին մարզպետն առերեսվել է չորս զինծառայողի հետ

Վայոց Ձորում փոխգնդապետին դաժան ծեծի ենթարկելու միջադեպի հետ կապված հակասական իրադրություն ունենք: Այս մասին լրագրողների հետ զրույցում ասաց ՀՀ Քննչական կոմիտեի նախագահ Հայկ Գրիգորյանը՝ անդրադառնալով հարցին՝ արդյո՞ք արդեն նախկին մարզպետ Տրդատ Սարգսյանը ներկա է եղել միջադեպին:

«Հակասական իրադրություն ունենք․ 4 զինծառայող պնդում է, որ մարզպետն այնտեղ է եղել, բայց ըստ մարզպետի շենքի մոտ տեղակայված տեսախցիկի տեսաձայնագրության՝ նա 22:30-ին մտնում է մուտք և 00:30-ին շքամուտքից դուրս է գալիս: Թեև այդ հանգամանքը կա, բայց զինծառայողները առերես էլ են պնդել, որ մարզպետն այնտեղ է եղել»,-ասաց նա: Հայկ Գրիգորյանը նշեց, որ տեսանյութը փորձաքննության են ենթարկել, և ըստ եզրակացության՝ այն մոնտաժված չէ: «Ուստի հակասական իրադրություն է, և պետք է դեռ քննել»,-ասաց նա:

Հիշեցնենք, որ ըստ պաշտոնական հաղորդագրության, Եղեգնաձոր քաղաքի շենքերից մեկի բակում տեղի ունեցած վիճաբանության ժամանակ Պաշտպանության նախարարության սպան ծանր մարմնական վնասվածքներ է ստացել։ 28-ամյա երիտասարդը բռունցքով մեկ անգամ հարվածել է սպայի գլխին, որի հետևանքով վերջինս վայր է ընկել։ Հարուցված քրեական գործի շրջանակում Վայոց Ձորի մարզպետի օգնական Հարություն Գրիգորյանին մեղադրանք է առաջադրվել՝ դիտավորությամբ անձին ծանր մարմնական վնաս պատճառելու համար:

Մարզպետի օգնականը կալանավորված է: Օգնականի կալանավորումից երկու օր անց Վայոց Ձորի մարզպետ Տրդատ Սարգսյանը հրաժարական էր ներկայացնել, սակայն շարունակել է պնդել, որ որևէ առնչություն չունի Եղեգնաձորում տեղի ունեցած միջադեպին, որի հետևանքով Պաշտպանության նախարարության փոխգնդապետը հայտնվել է կոմայի մեջ:

Նարեկ Կիրակոսյան