27.09.2026 | 10:55
Լոռու, Արմավիրի և Կոտայքի 4 համայնքներում ՏԻՄ ընտրություններ են․ ժամը 08։00-ին բացվել են բոլոր 14 տեղամասերը․ ԿԸՀ
Էրդողանը, անդրադառնալով Կոնգրեսում Հայոց ցեղասպանության ճանաչման մասին բանաձևի ընդունմանը, ասել է, որ «ԱՄՆ-ում մոռացել են հայկական ահաբեկչության մասին»
Քաղաքականություն
30.10.2019 | 15:54
Թուրքիայի նախագահ Ռեջեփ Թայիփ Էրդողանը, անդրադառնալով ԱՄՆ Կոնգրեսի Ներկայացուցիչների պալատի կողմից Հայոց ցեղասպանության մասին բանաձևի ընդունմանը, նշել է, որ ԱՄՆ-ում «մոռացել են հայկական ահաբեկչության մասին»: Այս մասին տեղեկացնում է ahaber.com կայքը:
Էրդողանի խոսքով՝ Թուրքիան բացել է 1915 թվականին վերաբերող բոլոր արխիվները, իսկ հայերը «նույնիսկ այդ պարագայում չեն կարողացել ապացուցել, որ ցեղասպանություն է եղել»:
Թուրքիայի նախագահը նշել է, որ իրենք խստորեն դատապարտում են ԱՄՆ Ներկայացուցիչների պալատի կողմից Հայոց ցեղասպանության ճանաչման մասին բանաձևի ընդունումը:
«Այդ բանաձևն Անկարայի համար ոչ մի իրավական ուժ չունի: Թուրքիայի խորհրդարանը կպատասխանի բանաձևն ընդունելու որոշմանը»,- նշել է Էրդողանը:
Մինչ Էրդողանի խոսքը, Թուրքիայի արտգործնախարար Մևլութ Չավուշօղլուն մեկնաբանել էր ԱՄՆ Կոնգրեսի Ներկայացուցիչների պալատի կողմից նախօրեին Հայոց ցեղասպանության մասին բանաձևի ընդունումը՝ այն անվանելով «ամոթալի»:
Հիշեցնենք, որ ԱՄՆ Կոնգրեսի Ներկայացուցիչների պալատում հոկտեմբերի 29-ին կայացած քվեարկության արդյունքում ձայների մեծամասնությամբ ընդունվել է Հայոց ցեղասպանությունը ճանաչող բանաձևը։ Քվեարկությանը մասնակցած կոնգրեսականներից կողմ է քվեարկել 405-ը, դեմ՝ 10-ը, ձեռնպահ՝ 3-ը, իսկ 14 կոնգրեսական չի քվեարկել։
