Կապանում Ողջի գետի աղտոտվածության աստիճանը կարելի է գնահատել նորմալ․ Կապանի քաղաքապետ

 Factor.am-ի զրուցակիցն է Կապանի քաղաքապետ Գևորգ Փարսյանը

-Պարոն քաղաքապետ, ի՞նչ իրավիճակ է այժմ Կապանում Ողջի գետի աղտոտվածության հետ կապված, ի՞նչ ռիսկեր եք տեսնում։

-Այժմ Կապանում Ողջի գետի աղտոտվածության աստիճանը կարելի է գնահատել նորմալ։ Որոշ հատվածներում միայն պոչանքի հետքեր են երևում, այն էլ նստվածքային ձևով։

-Ինչպե՞ս եք պատկերացնում խնդրի կարգավորումը։ Կապանի բնակիչներն ահազանգում են, որ գետի հարակից բնությունն ու կենդանական աշխարհը աղետալի վիճակում են։

-Խնդրի կարգավորումը տեսնում ենք հանքարդյունաբերող կազմակերպության կողմից էլ առավել աչալուրջ լինելու մեջ բնապահպանական ռիսկերի նկատմամբ՝ իրականացնելով բոլոր բնապահպանական միջոցառումները և լինելով միաժամանակ ավելի զգոն։

-Տեսանյութեր կան, որոնցում երևում է, որ Կապանի կոմբինատի թափոնաջրերը քաղաքի միջով, բնակելի տների հենց կողքով բաց հոսում են ու խառնվում Ողջի գետին: Այս հարցի լուծումը ինչպե՞ս պիտի տրվի։

-Դրանք Կապանի կոմբինատի թափոնաջրերը չեն, դրանք նախկինում շահագործված բաց հանքից հոսող թթվաջրերն են, որի լուծումը տեսնում ենք միայն բաց հանքի ռեկուլտիվացիոն աշխատանքների իրականացմամբ։

– Շրջակա միջավայրի նախարարն ասում է, որ գետի աղտոտման համար տուգանքները շատ քիչ են, իսկ որոշ բնապահպաններ պնդում են, որ տուգանքների փոխարեն պետք է քրեական գործեր հարուցվեն։ Գետի աղտոտմանը վերջը դնելու ո՞ր տարբերակին եք կողմ։

– Վարչական պատասխանատվության ենթարկելու հարցը Շրջակա միջավայրի նախարարության տիրույթում է, և նրանք ավելի ճշգրիտ կպատկերացնեն տուգանքի չափերը։ Ես այն կարծիքին եմ, որ պետք է ենթարկվեն վարչական պատասխանատվության, քանի որ նման վթարները անզգուշության պարագայում են տեղի ունենում։ Իսկ դիտավորության դեպքում, գտնում եմ, որ պետք է ենթարկվեն քրեական պատասխանատվության։

-Որպես համայնքի ղեկավար ի՞նչ քայլեր եք ձեռնարկել, և պատրաստվում ձեռնարկել հարցի լուծմանը հասնելու համար։

-Դիմել ենք Զանգեզուրի պղնձամոլիբդենային կոմբինատի գլխավոր տնօրեն Մհեր Պոլոսկովին, որպեսզի տրամադրեն համապատասխան տեխնիկա՝ գետը մաքրելու համար։

Լիլիթ Շաբոյան