07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Թող վայնասուն չբարձրացնեն, հանրությունը գիտի Հրայր Թովմասյանի գործած հանցանքի չափը․ Արման Բաբաջանյան. ՏԵՍԱՆՅՈՒԹ
Քաղաքականություն
18.10.2019 | 20:00
Factor.am-ի հարցազրույցը ՀՀ ԱԺ պատգամավոր Արման Բաբաջանյանի հետ
– Պարո՛ն Բաբաջանյան, ՀՔԾ-ն Ձեր հաղորդման հիման վրա գործ է հարուցել իշխանությունը յուրացնելու հանցագործության դեպքի առիթով, որին հետևեցին Հրայր Թովմասյանի ընտանիքի անդամներին ԱԱԾ հրավիրելու գործողությունները: Այդ կապակցությամբ մի խումբ փաստաբաններ, իրավապաշտպաններ և քաղաքական գործիչներ բողոքի ակցիա էին անում ԱԱԾ-ի դիմաց: Անշուշտ, այս երկու դեպքերը՝ Ձեր դիմումի հիման վրա գործ հարուցելն ու Հրայր Թովմասյանի ընտանիքի անդամներին ԱԱԾ հրավիրելը, ֆորմալ առումով իրար հետ կապ չունեն: Այնուամենայնիվ, սա զուտ իրավակա՞ն գործընթաց է: Ձեր գնահատականն եմ խնդրում հատկապես Հրայր Թովմասյանի դուստրերին ԱԱԾ հրավիրելու մասով:
– Այդ հրավերներն իմ դիմումի հետ ոչ մի կապ չունեն: Դրանք, կարծեմ, նրա գույքի ծագման հետ կապված մամուլում տեղ գտած հրապարակումների առթիվ Գլխավոր դատախազությունն է ԱԱԾ-ին ուղարկել: Քննչական մարմինները զբաղվում են այդ գործով: Կարծում եմ՝ ոչ մի արտասովոր բան չկա, որ Հրայր Թովմասյանի հայրը, դուստրերը… ես կարծում եմ՝ հակառակը, պետք է Հրայր Թովմասյանն ինքը նախաձեռներ, որպեսզի իր բոլոր ազգականները ներկայանային ԱԱԾ, և եթե ինքը որևէ թաքցնելու բան չունի, որովհետև հրապարակումները եղել են մամուլում և, ըստ ամենայնի, այդ մամուլի հրապարակումների շրջանակում է հարցաքննությունը:
– Ինչո՞ւ իրար հետ կապվեցին այս երկու գործերը:
– Ես չգիտեմ: Դրանք չեն կապվել, որովհետև մեկը ՀՔԾ-ում է, բոլորովին այլ քննչական գործողություններ են տեղի ունեցել ՀՀԿ-ում և Սահմանադրական դատարանում, մյուսը՝ մամուլում տեղ գտած հրապարակումների առթիվ բոլորովին այլ վարույթ է և այլ գործի շրջանակ է: Մենք այնպիսի հետապնդումներ ենք տեսել… ես կարծում եմ՝ այստեղ ոչ մի հետապնդման նշան չկա, թող վայնասուն չբարձրացնեն, և բողոքի, այսպես կոչված, ակցիաները ոչինչ չեն ասում: Մանավանդ, հանրությունը գիտի՝ ով ով է, հանրությունը շատ լավ գիտի Հրայր Թովմասյանի գործած հանցանքի չափը, և կարծում եմ, որ ԱԱԾ-ն բավարար հիմքեր ունի՝ առնվազն այս պահին քննության առարկա դարձնելու մամուլում տեղ գտած հրապարակումների իսկությունը:
– Այնուամենայնիվ, նախկին իշխանությունների ակտիվ ընդդիմախոս Զարուհի Փոստանջյանն այսօր ԱԱԾ-ի մոտ ասել է, որ Փաշինյանի կամակատար չլինելու համար Հրայր Թովմասյանի ընտանիքը ենթարկվում է բռնաճնշումների…
– Ես ընդամենը կարող եմ ասել, որ նախկինում իմ պաշտպան Զարուհի Փոստանջյանի այս դիրքորոշման հետ համաձայն չեմ:
– Գևորգ Կոստանյանն այսօր հայտարարել է, որ ՍԴ դատավորին որպես մեղադրյալ ներգրավելու համար ՍԴ-ն պետք է համապատասխան որոշում կայացնի: ՀՔԾ-ն Ձեր դիմումի հիման վրա արդեն գործ է հարուցել, սակայն Հրայր Թովմասյանը որևէ կարգավիճակ դեռևս չունի: Այս իրավիճակն ինչպե՞ս եք գնահատում:
– Դեռևս չունի կարգավիճակ, եթե նրան մեղադրյալի կարգավիճակ տրվի, ապա Գլխավոր դատախազությունը նյութերի հիման վրա կդիմի Սահմանադրական դատարան, իսկ ՍԴ-ն կընդունի վարույթ, թե չի ընդունի, դա էլ արդեն առանձին գործընթաց է, որից հետո քննության կդարձնի՝ նրան անձեռնմխելիությունից զրկե՞լ, թե՞ ոչ, դրանից հետո արդեն հայտնի ընթացակարգով գործընթացը կշարունակվի:
Հարցազրույցն ամբողջությամբ՝ տեսանյութում:
Մհեր Արշակյան
