Գագիկ Ծառուկյանը Ազգային ժողովի նիստերից բացակայում է հարգելի պատճառներով. Իվետա Տոնոյան

«Գագիկ Ծառուկյանը, որպես Հայաստանի օլիմպիական կոմիտեի նախագահ, իր գործառույթներն է իրականացնում: Այս պահին էլ այցով գտնվում է արտերկրում, իսկ պարոն Ծառուկյանի բացակայությունների հետ կապված բոլոր հիմնավորումները ներկայացվում են Ազգային ժողովի նախագահին», – մանրամասնեց Տոնոյանը:

Իվետա Տոնոյանն անդրադարձավ նաև օրերս մամուլում աղմուկ բարձրացրած այն հարցին, որ իրենց խմբակցության մի քանի պատգամավորներ ևս Երևանում վարձով բնակարանների համար ԱԺ-ից 100 հազար դրամ փոխհատուցում ստանալու համար դիմումներ են ներկայացրել, ապա դիմումները հետ են վերցրել:

Տոնոյանը վստահեցրեց՝ Գագիկ Ծառուկյանի կողմից ճնշումներ չեն գործադրվել, ինչպես մամուլն է գրում. «Պարոն Ծառուկյանի հետ այդ թեմայով խոսելու հնարավորություն չի եղել, նա գործուղման է արտերկիր։ Ինչ վերաբերում է կոնկրետ մեր պատգամավորների հետ կապված այդ հարցին, ապա կուզենայի իմ գործընկերների ուշադրությունը հրավիրել այլ խմբակցությունների, այլ կուսակցությունների ներկայացուցիչների գործողություններին, որոնք ևս օգտվում են վարձով բնակարանի հնարավորությունից»:

Ավելի վաղ, խմբակցության պատգամավոր Վարդան Ղուկասյանը Factor.am-ին ասել էր, որ դիմումը հետ է վերցրել, պատգամավորը, սակայն, պատճառների մասին չէր խոսել:

Նշենք, որ «ՀՀ Ազգային ժողովի պատգամավորի գործունեության երաշխիքների մասին» ՀՀ օրենքի 9-րդ հոդվածով սահմանված կարգով մարզերում բնակվող որոշ պատագմավորներ դիմել և ստանում են Երևան քաղաքում բնակարանի վարձին համարժեք փոխհատուցում։

Մանրամասները՝ տեսանյութում:

Շողիկ Գալստյան