28.11.2024 | 19:52
«Ես կանկրետնի առաջադրվելու եմ, դանակը օսկորին է հասել»․ Վարդան Ղուկասյան
Գերմանացի հրաձիգը խոստովանել է՝ հանցագործությունը կատարել է հակասեմականության հողի վրա
Քաղաքականություն
11.10.2019 | 20:28
Գերմանական Հալլեում սինագոգի մոտ հրաձգությունից հետո ձերբակալված Շտեֆան Բ.-ն խոստովանել է իր մեղքը և ընդունել իր արարքի՝ ծայրահեղական և հակասեմական դրդապատճառները: Այս մասին հայտնել է Գերմանիայի Դաշնային դատախազության ներկայացուցիչը, հաղորդում է DW-ն:
Մի քանի ժամ տևած հարցաքննության ժամանակ 27-ամյա տղամարդն ինքնախոստովանական ցուցմունք է տվել: Հարցաքննությունը վարել է Գերմանիայի Դաշնային դատական պալատի քննչական դատավորը:
Մինչ այդ, Բունդեսրատում մեկ րոպե լռությամբ հարգել են Հալլեի զոհերի հիշատակը։ Դաշնային հողերի ներկայացուցչության նախագահ Դանիել Գյունտերը հայտարարել է երկու օր առաջ տեղի ունեցած «նենգ հանցագործությունից» եզրակացություններ անելու անհրաժեշտության մասին: «Բոլորը պետք է իմանան ատելության դեմ պայքարի անհրաժեշտ միջոցների մասին»,- ասել է նա:
Ներկայում Շտեֆան Բ.-ն նախնական կալանքի տակ է: Նրան մեղադրում են երկու անձի սպանության և յոթ անձի նկատմամբ մահափորձի մեջ:
Նշենք, որ խուզարկության ժամանակ Շտեֆան Բ.-ի մեքենայում, զենքից բացի, 4 կգ պայթուցիկ է հայտնաբերվել։
Գերմանիայի արդարադատության նախարար Քրիստինա Լամբրեխտը սա անվանել է միայնակ հանցագործի «էքստրեմալ ահաբեկչական հարձակում»:
Միաժամանակ, Հալլեի պատահարից հետո Եվրահանձնաժողովը դիմել է ԵՄ անդամ բոլոր պետություններին՝ գրավոր կոչ անելով ապահովել հրեական հաստատությունների բավարար պաշտպանությունը:
«Մի շարք երկրներում այդ առումով անհրաժեշտ են բարելավումներ»,- հայտարարել է հակասեմականության հարցերով Եվրահանձնաժողովի լիազոր ներկայացուցիչ Կատարինա ֆոն Շնուրբայնը:
Նրա խոսքով՝ հրեական համայնքների անվտանգության ապահովման համար պատասխանատվություն է կրում յուրաքանչյուր առանձին պետություն: «Այդ խնդիրը մենք պետք է լուծենք ամբողջ Եվրոպայում»,- հայտարարել է նա՝ հավելելով, որ Եվրամիության անդամ երկրներին անհրաժեշտ է նաև մասնակցել սինագոգների անվտանգության ապահովման միջոցների ֆինանսավորմանը:
