Տոկաևն առաջարկել է ԱՊՀ-ում միասնական՝ «Շենգեն»-ի նման վիզային համակարգ ստեղծել

Ղազախստանի նախագահ Կասիմ-Ժոմարտ Տոկաևն առաջարկել է մտածել ԱՊՀ-ում միասնական՝ «Շենգեն»-ի նման վիզային ռեժիմ ստեղծելու մասին: Այն կարող է դառնալ «Վիզա-համագործակցություն»: Այս մասին գրում է ՌԻԱ Նովոստին:

Աշխաբադում անցկացված ԱՊՀ անդամ պետությունների ղեկավարների խորհրդի նիստում Ղազախստանի նախագահն ուշադրություն է հրավիրել զբոսաշրջության ոլորտում այն մեծ պոտենցիալի վրա, որն ունի միավորման մեջ մտնող յուրաքանչյուր երկիր: Նա ընդգծել է, որ յուրաքանչյուր երկիր ունի իր ուրույն բնապատկերային և պատմական օբյեկտները, որոնք կարող են արժանապատվորեն լրացնել աշխարհի առավել գրավիչ զբոսաշրջային ուղղությունների ցանկը:

«Ցավոք, ազգային վիզային և միգրացիոն ռեժիմներում պահպանվում են զգալի տարբերություններ։ Դրանք անհարմարություններ են ստեղծում արտասահմանցի զբոսաշրջիկների համար, որոնք ցանկանում են այցելել միանգամից մի քանի ԱՊՀ երկրներ: Ես հասկանում եմ, իհարկե, դա դժվար է, բայց գուցե պետք է դիտարկել ԱՊՀ տարածքում «Համագործակցության վիզա» պայմանական անվանումով պայմանական ռեժիմի սահմանման հարցը»,- առաջարկել է Տոկաևը:

Նրա խոսքով՝ նման մոտեցումը թույլ կտա մի քանի անգամ ավելացնել տուրիստական հոսքը։ «Իհարկե, մեր փորձագետները պետք է լրջորեն աշխատեն այս հարցի շուրջ»,- հավելել է Ղազախստանի նախագահը:

Թուրքմենստանի մայրաքաղաք Աշխաբադում, հիշեցնենք, այսօր տեղի է ունեցել  ԱՊՀ անդամ պետությունների ղեկավարների գագաթնաժողովը: Պատվիրակությունների ղեկավարները միաձայն որոշում են կայացրել ԱՊՀ պետությունների ղեկավարների Խորհրդի նախագահությունը 2020 թվականին Ոզբեկստանին հանձնելու մասին:

ԱՊՀ ղեկավարների հաջորդ գագաթնաժողովը կանցկացվի 2020 թվականի հոկտեմբերի 16-ին Տաշքենդում: