Ինչ ազդեցություն կունենա Հայկ Հարությունյանի մահը Մարտի 1-ի գործի բացահայտման վրա. ՏԵՍԱՆՅՈՒԹ

Հայաստանի նախկին ոստիկանապետ Հայկ Հարությունյանի մահվան հանգամանքը կարող է իր որոշակի ազդեցությունն ունենալ Մարտի 1-ի գործի բացահայտման համար, բայց թե այն ինչպիսին կլինի, այս պահին գլխավոր դատախազ Արթուր Դավթյանը դժվարանում է ասել:

«Հայկ Հարությունյանը հրավիրվելու էր դատարան, և ինքը ցուցմունք էր տալու, հարցեր էին հնչելու նաև դատախազների կողմից, որի հնարավորությունը, ցավոք, այլևս չկա։ Թե ինչպե՞ս կարող է ազդել դա՝ ժամանակի ընթացքում կերևա, հիմա ասել չեմ կարող»,- ասաց դատախազը։

Հիշեցնենք, որ երեկ իր առանձնատանը հայտնաբերվել է Մարտի 1-ի գործով գլխավոր վկաներից մեկի՝ Հայկ Հարությունյանի դին։ Դեպքի առիթով՝ ինքնասպանության կամ ինքնասպանության փորձի հասցնելու հատկանիշներով հարուցվել է քրեական գործ։

Մամուլը երեկ գրեց, թե նախքան մահանալը՝ Հարությունյանն ասել է, որ ՀՔԾ պետն ու Գլխավոր դատախազը իրեն ստիպել են Մարտի 1-ի գործով ցուցմունք տալ Ռոբերտ Քոչարյանի դեմ։ ՀՔԾ պետի տեղակալն ասաց՝ «դա հերյուրանք է», իսկ Գլխավոր դատախազը արձագանքեց՝ «պատվեր է»։

Մարտի 1-ի գործով տուժողի ներկայացուցիչ Արա Ղարագյոզյանի խոսքով՝ Հարությունյանի մահը կարող է լուրջ ազդեցություն ունենալ այս գործի հետագա բացահայտման համար։ Փաստաբանի խոսքով՝ Հարությունյանի տված ցուցմունքները բազում հարցեր էին առաջ բերել, որոնց պատասխաններն ակնկալում էին ստանալ դատարանում։ Արա Ղարագյոզյանը իրավապահ կառույցներին կոչ է անում այս գործով անցնող վկաներին իրենց ուշադրության կենտրոնում պահել, հակառակ դեպքում՝ իրադարձությունների նման զարգացման արդյունքում Մարտի 1-ի գործը կմտնի փակուղի։

Մանրամասները՝ տեսանյութում։

Լիլիթ Շաբոյան