03.02.2026 | 23:21
Ֆրանսիան պատրաստ է լիակատար աջակցություն ցուցաբերել Հայաստանին COP17-ի կազմակերպման հարցում
Մարդու իրավունքներին վերաբերող նոր հոդվածներ՝ հայալեզու Վիքիպեդիայում. մեկնարկել է «Հոդված 3» փառատոնը
Հասարակություն
17.09.2019 | 11:40
«Հոդված 3» մարդու իրավունքների փառատոնի շրջանակում՝ միջոցառումների երրորդ օրը, կամավորները հարստացրին հայերեն Վիքիպեդիայի հոդվածների պաշարը։ «Խմբագրաթոն» կոչվող միջոցառման ընթացքում փառատոնի կամավորները, խորհրդատու-մասնագետների օգնությամբ, պատրաստել, խմբագրել ու հրապարակել են մարդու իրավունքների վերաբերյալ 16 հոդվածներ։
Փառատոնը նախաձեռնած «Հանուն հավասար իրավունքների» կրթական կենտրոն ՀԿ ղեկավար Սաթենիկ Բաղդասարյանի խոսքով՝ մարդու իրավունքների վերաբերյալ հոդվածների թիվը հայերեն Վիքիպեդիայում բավական քիչ է, այդ պատճառով որոշել են նաև նմանատիպ միջոցառում անցկացնել:
Երեխաների, աշխատանքի, պացիենտի և մի շարք այլ իրավունքների մասին պատմող հոդվածների պատրաստման աշխատանքներըհետաքրքրել են ինչպես կամավորներին, այնպես էլ նրանց օգնող մասնագետներին։ Կամավորներից մի քանիսը նույնիսկ առաջարկ են ստացել՝ շարունակել իրենց գործունեությունը։
ԵՊՀ ուսանողուհի Սյուզի Գրիգորյանի հոդվածը նվիրված էր երեխաների իրավունքներին: Նշում է, որ սեղմ ժամկետներում մենթոր Աիդա Մուրադյանի հետ կարողացել են համապարփակ ներկայացնել երեխաների իրավունքները։
«Միջոցառումը մեծ փորձ տվեց ինչպես լավ հոդված պատրաստելու, այնպես էլ մենթորի հետ աշխատելու տեսանկյունից, լավ հմտություններ ստացա, լավ ընկերներ ձեռք բերեցի: Ցանկություն ունեմ հետագայում ավելի շատ հոդվածներ տեղադրել Վիքիպեդիայում։ Շատ էի օգտվում այս առցանց հանրագիտարանից, և երբ հարկավոր թեմաներով հոդվածներ չէի գտնում, շատ էի նեղվում, սակայն հիմա արդեն ինքս կարող եմ գրել ու ավելացնել դրանք»,- ասում է Գրիգորյանը՝ հավելելով, որ համագործակցության արդյունքում Վիքիմեդիա Հայաստանի գրասենյակից գործունեությունը շարունակելու առաջարկ է ստացել։
Ծրագրի արդյունքում իր նախընտրած ոլորտում գործունեությունը շարունակելու առաջարկ է ստացել նաև գենդերային թեմայով հոդվածի հեղինակ Մելանյա Հովհաննիսյանը։ Մելանյայի մենթորը՝ ԵՊՀ գենդերային հետազոտությունների կենտրոնից Սիրան Հովհաննիսյանը, դրական գնահատելով կամավորի աշխատանքը՝ առաջարկել է պրակտիկա անցնել իրենց կենտրոնում։
«Մելանյայի հետ որոշեցինք շարունակել աշխատանքը, և արդեն հոկտեմբերից նա ԵՊՀ գենդերային հետազոտությունների կենտրոնում կսկսի պրակտիկան, որը կներառի տարբեր աշխատանքներ: Առհասարակ, շատ կարևոր միջոցառում էր, որը թույլ տվեց առավել համապարփակ ներկայացնել մեզ վստահված թեման, ինչպես նաև նոր հմտություններ տվեց»,- նշում է Սիրան Հովհաննիսյանը։
Հիշեցնենք, որ «Հանուն հավասար իրավունքների» կրթական կենտրոն ՀԿ-ի կողմից կազմակերպվող «Հոդված 3» մարդու իրավունքների փառատոնն այս տարի անցկացվում է սեպտեմբերի 14-20-ին, Երևանում և Վանաձորում՝ «Ես էլ եմ այստեղ» խորագրով, և նվիրված է ատելության խոսքի կանխարգելմանը։ Հանրային, մշակութային միջոցառումների միջոցով մարդու իրավունքների մասին իրազեկվածությունը բարձրացնելու, նոր գիտելիքներ ստանալու այլընտրանքային հարթակի նպատակ ունեցող փառատոնի շրջանակում այս տարի տեղի կունենան թատերական ներկայացումներ, մարդու իրավունքների շուրջ զրույցներ, Վիքիպեդիա Խմբագրաթոն, սթրիթ-արթ, վազքի մարաթոն, տոնական համերգ։
Սեպտեմբերի 17-ից փառատոնը կշարունակվի Վանաձորում։ Այստեղ միջոցառումների մեկնարկը կտրվի Հովհաննես Աբելյանի անվան պետական դրամատիկական թատրոնում՝ «Իմ ընտանիքն իմ ճամպրուկում է» մոնոներկայացմամբ։ Արդեն հաջորդ օրը Հայաստանի Հելսինկյան կոմիտեի նախագահ Ավետիք Իշխանյանի և գրող, հրապարակախոս Արմեն Հայաստանցու հետ կքննարկվեն մարդու իրավունքները հայ գրականությունում, մասնավորապես՝ Հովհաննես Թումանյանի ստեղծագործություններում, սեպտեմբերի 19-ին էլ ինտերակտիվ թատերական բեմադրություն կներկայացվի ՔՈԱՖ Սմարթ կենտրոնում։
Փառատոնի փակումը սեպտեմբերի 20-ին է՝ Վանաձորի Շառլ Ազնավուրի անվան մշակույթի պալատի բակում նախանշված «Ռոքը հանուն իրավունքների» բացօթյա համերգով, որի ժամանակ նույն բեմում հանդես կգան հայտնի ու սիրված «Լավ էլի» և «Բամբիռ ռոք» խմբերը։
Նշենք, որ 2018 թվականին փառատոնը տեղի է ունեցել Երևան և Գավառ քաղաքներում՝ «Երիտասարդ, արի՛ սովորենք» խորագրով:
