10.10.2026 | 19:47
Քննարկվել են Հայաստանում կախվածությունների կանխարգելման և բուժման ուղղությամբ իրականացվող աշխատանքները
180 հոգու համար նախատեսված Աշտարակի դպրոցում սովորում է 602 աշակերտ․ անժամկետ դասադուլ է հայտարարվել
Հասարակություն
26.09.2017 | 12:41
Աշտարակի Վարդգես Պետրոսյանի անվան հիմնական դպրոցի ծնողական խորհուրդը այսօրվանից անժամկետ դասադուլ է հայտարարել: Այս մասին Factor.am-ին տեղեկացրեց դպրոցի մաթեմատիկայի ուսուցիչ Ռուզաննա Նազինյանը։ Նրա խոսքով՝ ծնողները բողոքի ալիք են բարձրացրել այն պատճառով, որ 180 հոգու համար նախատեսված դպրոցի մասնաշենքում սովորում է 602 աշակերտ, դասավանդում՝ 50 ուսուցիչ։
«Թե՛ նախորդ, թե՛ այս տարի թվով երկու 38 հոգանոց առաջին դասարան է բացվել՝ տեղ չլինելու պատճառով։ Այնինչ, տնօրենը դրա իրավունքը չունի։ Մենք նախորդ տարի մեկ անգամ նախազգուշական գործադուլ ենք արել, բայց, փաստորեն, պատկան մարմինները ուշադրություն չդարձրին մեր խնդիրներին։ Իսկ խնդիրը պահանջում է հրատապ լուծում։ Մենք օրեր առաջ բաց նամակ ենք հղել պատկան մարմիններին 7-10 օր ժամկետ էինք տվել՝ մեզ ականջալուր լինելու համար, այնինչ 13 օր անցել է և ոչ մի արձագանք։ Միայն Արագածոտնի մարզպետարանի կրթության բաժնի պետ Մամիկոն Աբգարյանն է երկու անգամ եկել դպրոց, բայց բանավոր խոստումներից այն կողմ սայլը ոչ մի սանտիմետր տեղից չի շարժվել»,- ասաց մեր զրուցակիցը։
Նրա խոսքով՝ դասադուլի հեղինակը բոլոր դասարանների ծնողկոմիտեների նախագահներն են՝ ծնողական խորհրդի հետ միասին։ Ուսուցչուհին շեշտեց՝ Հայաստանում այսօր խախտվում է 601 աշակերտի կրթություն ստանալու ՀՀ սահմանադրությամբ նախատեսված իրավունքը։
«Երեխաները տարիներ շարունակ սովորում են, ինֆորմատիկայի, ֆիզիկայի կաբինետների երես չեն տեսնում, քիմիայի փորձերից գափափար չունեն, որովհետեւ դրանք իրականացնելու հնարավորությունը չունեն։ Դասասենյակներում օդ չկա շնչելու»,- պատմեց տիկին Նազինյանը։
Նա նշեց, որ դպրոցի տնօրեն Գրիշա Գևորգյանը համակարծիք է դասադուլ անողների հետ, կիսում է բոլորի մտահոգությունները և ինքն էլ ուզում է դպրոցի խնդիրներն օր առաջ լուծված տեսնել։
Աննա Բաբաջանյան
