Օդում մնացած խոստումներ․ «Խաղողագործների միության» նախագահը բարձրաձայնում է ոլորտի խնդիրները

«Հայաստանի խաղողագործների միության» նախագահ Արտակ Սարգսյանի համոզմամբ՝ խաղողագործությունը, թեև Կառավարության որոշմամբ, համարվել է գերակա ճյուղ, սակայն այս ոլորտում առկա են բազմաթիվ խնդիրներ, իսկ խաղողագործներն իրենց խնդիրների հետ մնացել են միայնակ։ Այս մասին այսօր հրավիրված աասուլիսի ժամանակ ասաց  միության նախագահ Արտակ Սարգսյանը՝ նշելով, որ թեև սահմանվել է խաղողի գնի մթերման որոշակի աճ, բայց դա չի լուծում խաղողագործների խնդիրները։

«Խաղողագործները դիմում են վերամշակողներին, փորձում են գնի հետ կապված պայմանագրային պարտավորություններ սահմանել, այդ վերամշակողները մատնացույց են անում Երևանի կոնյակի գործարանին և նշում՝ ինչ գնով ընդունում են, դրանով էլ իրենց բերքը կընդունեն։ Բայց չէ՞ որ կա մրցակցության խնդիր․ եթե լիներ մրցակցություն, մենք կունենայինք խաղողի գնի աճ»,- ասաց  Սարգսյանը՝ կարևորելով խաղողագործության զարգացման համար պետության  կողմից կիրառվող անհրաժեշտ գործիքները, այդ թվում՝ խաղողի գնի սուբսիդավորումը։

«Հայաստանի խաղողագործների միության» նախագահի խոսքով՝ թեև ՀՀ օրենքով հստակ ամրագրված է, որ հայկական կոնյակը և գինին պետք է արտադրվեն բացառապես հայկական խաղողով, սակայն այս հարցում պատշաճ վերահսկողություն չկա, ինչի պարագայում չկա ազատ մրցակցություն և խաղողի գնի աճ։

«Անհայտ ծագում ունեցող, բայց հայկական գինու և կոնյակի արտադրության տակ արտադրություն ունենք, որն առաջինն է խոչընդոտում հայկական գինեգործությանն ու կոնյակագործությանը։ Բայցի այդ, գարնանը խոստացան, որ հրթիռային և հակակարկտային պիլոտային ծրագիր կանեն, բայց այդ խոստումը մնաց օդից կախված։ Խոստացան նաև,  որ բազմամյա կուլտուրաների համար՝ այդ թվում խաղողի և ծիրանի, պետք է ներդրվի ապահովագրություն, այդ խոստումը ևս  մնաց օդից կախված»,-ասաց  Սագսյանը։

Խոսելով  խաղողագործության ձեռքբերումների մասին՝ Սարգսյանն առանձնացրեց  այն, որ վաղ գարնանից խաղողագործների հետ կնքվում են պայմանագրեր, որտեղ հստակ նշված է մթերվող խաղողի գինը։

Որպես ձեռքբերում Սարգսյանը նաև առանձնացրեց վերամշակող ընկերություններին սուբսիդավորմամբ տրվող գումարը, որով նրանք կարողանում են խաղող մթերել։