Նախարարության գլխավոր նպատակներից է կանխել տաղանդի արտահոսքը. Հակոբ Արշակյան. ՏԵՍԱՆՅՈՒԹ

Սփյուռքի գործերի գլխավոր հանձնակատարի գրասենյակի և ՀՀ բարձր տեխնոլոգիական արդյունաբերության նախարարության միջև սեպտեմբերի 5-ին կնքվեց փոխըմբռնման հուշագիր՝ «ՆերՈւժ» սփյուռքի սթարթափ ծրագիրը համատեղ իրականացնելու վերաբերյալ: Հուշագիրը ստորագրեցին գլխավոր հանձնակատար Զարեհ Սինանյանը և նախարար Հակոբ Արշակյանը:

Համագործակցությունը նպատակ ունի նպաստել ՀՀ-ում և սփյուռքում հայրենադարձությունը խթանող միջավայրի ձևավորմանը, ինովացիոն, բարձր և տեղեկատվական տեխնոլոգիաների բնագավառներում հայկական սփյուռքի հետ աշխատանքի ակտիվացմանը և տեղի սթարթափ էկոհամակարգի զարգացմանը:

«Հաշվի առնելով սփյուռքից հայրենադարձության խթանման կարևորությունը, ինչպես նաև սփյուռքից ներդրումների կարևորությունը, մասնավորապես՝ բարձր տեխնոլոգիաների ոլորտում, շարունակում ենք «ՆերՈւժ» ծրագրի իրագործումը: Անցյալ տարի այն իրագործվեց բավական մեծ հաջողությամբ՝ 100-ից ավելի ընկերություններ մասնակցեցին այդ ծրագրին, որի արդյունքում եղան 9 հաղթողներ: Նրանք ստացան զգալի գումարներ և այլ խթանիչներ, որպեսզի կարողանան իրագործել իրենց ծրագրերը: Այս տարի շարունակում ենք նույն նպատակներով, բայց շեշտը դրվելու է բարձր տեխնոլոգիաների ոլորտի վրա, հետևաբար, ծրագիրը փոխանցվել է Բարձր տեխնոլոգիական արդյունաբերության նախարարությանը: Օգտագործելու են նաև մեր սփյուռքի կապերի ողջ ներուժը»,- ընդգծեց Արշակյանը:

Սփյուռքի գործերի գլխավոր հանձնակատարը հայտնեց, որ այս տարի մի փոքր փոխում են ձևաչափը: Եթե անցյալ տարի հայաստանյան ընկերությունները ևս ներգրավված են եղել ծրագրին, ապա այս տարի որպես մասնակից հաղթելու հնարավորություն են ունենալու միայն սփյուռքի ընկերությունները: Միևնույն ժամանակ, Հայաստանի ընկերություններին հնարավորություն է ընձեռվելու մասնակցելու այդ քառօրյա հավաքին:

Նախարար Հակոբ Արշակյանի խոսքով` Բարձր տեխնոլոգիական արդյունաբերության նախարարությունը ստեղծվել է տեխնոլոգիական էկոհամակարգի, ինչպես նաև թվայնացման և ռազմարդյունաբերության զարգացման համար, և այս ծրագրով ևս մեկ քար է դրվելու «Հայկական վիրտուալ կամուրջ» ծրագրի իրականացման գործում:

«Այստեղ, կարելի է ասել, անփոխարինելի է Սփյուռքի գործերի գլխավոր հանձնակատարի գրասենյակի աջակցությունը և մասնակցությունը, դա է պատճառը, որ մենք այսօր այստեղ ենք, որպեսզի ստորագրենք հուշագիրը: Մենք ցանկանում ենք, որպեսզի Հայաստանը դառնա տեխնոլոգիական կենտրոն տարածաշրջանի համար: Սա ապահովելու համար ամենամեծ գործոնը, որն այս պահին առկա է, և որը մրցակցային առավելություն է տալիս մնացած պետությունների նկատմամբ տարածաշրջանում, սփյուռքն է: Այս առումով ունենք բավական լուրջ ներուժ և ձեռներեցներ, մեծ ընկերություններում աշխատողներ, ովքեր տիրապետում են համաշխարհային տնտեսական կարգին: Այս ծրագրով նպաստում ենք նախարարության ամենագլխավոր նպատակներից մեկին՝ տաղանդի արտահոսքի կանխմանը և ներհոսքի խթանմանը»,- եզրափակեց Արշակյանը:

Մանրամասները՝ տեսանյութում:

Նարեկ Կիրակոսյան