27.09.2026 | 18:41
ՏԻՄ ընտրությունների մասնակցության արդյունքները ըստ համայնքների՝ 17։00-ի դրությամբ
ԵԱՀԿ Մինսկի խմբի համանախագահությունը խաղաղ կարգավորման գործընթացում եղել և մնում է միակ գործող ձևաչափը. ՀՀ ԱԳ նախարար
Քաղաքականություն
03.09.2019 | 19:22
Օգոստոսի 27-ին Երևանում մեկնարկած ՀՀ արտաքին գործերի նախարարության կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովին աշխարհագրական և թեմատիկ առումներով անդրադարձ է կատարվել մեր գերակայություններին, որոնք հիմնված են մեր արտահայտած արժեքների և շահերի համադրման ու արտաքին քաղաքականության հիմնական սկզբունքների վրա: Այս մասին լրագրողների հետ ճեպազրույցում ասել է ՀՀ արտաքին գործերի նախարար Զոհրաբ Մնացականյանը:
Նախարարի խոսքով` համաժողովին ներկայացվել են այն սկզբունքները, որոնց հիման վրա իրականացվում է Հայաստանի արտաքին քաղաքականությունը: Դա ինքնիշխանությունն է, համահայկականությունը և փոխգործակցությունը:
«Արտաքին քաղաքականությունը ծառայում է մեր ազգային նպատակների լավագույնս իրականացմանը` օգտագործելով միջազգային համագործակցության բոլոր հնարավոր հարթակները: Այդ առումով մենք ձևավորել ենք մեր գերակայությունները և համապատասխանաբար գնահատում ենք մեր գործողությունները ըստ տարբեր հնարավորությունների ու մարտահրավերների: Մեր քաղաքականությունն ունի սկզբունքներ, որոնցից մենք չենք հրաժարվելու և դրա հետ մեկտեղ համադրելու ենք մեր շահերը` առաջ տանելով մեր նպատակները: Մեզ համար ԵԱՀԿ Մինսկի խմբի համանախագահության ձևաչափը եղել և մնում է ներկայիս միակ գործող ու արդյունավետ ձևաչափը, որի մեջ իրականացնում ենք խաղաղ կարգավորման գործընթացը»,- մասնավորապես նշել է Զ. Մնացականյանը:
