Տնտեսություն
27.08.2019 | 12:48
Հայաստանում բռնկվող հրդեհները հնարավոր էր կանխարգելել, իսկ դրա համար նախապես աշխատանք պետք է տարվեր մարզպետարանների կողմից. այս մասին այսօր հրավիրված մամուլի ասուլիսի ժամանակ ասաց «Ագրարագյուղացիական միավորում» հասարակական կազմակերպության նախագահ Հրաչ Բերբերյանը:
«Մարզպետարանները պետք է հետևողական լինեին, չորացած խոտը ժամանակին պետք է հնձվեր, բնականաբար, հրդեհների քանակը պակաս կլիներ: Իրենք ուղղակի չեն հասկանում, թե որտեղ են աշխատում կամ երևի եկել են պարգևներ ստանալու համար: Ոնց որ հանրապետությունում է վիճակը, այնպես էլ հրդեհների վիճակն է»,- նկատեց Բերբերյանը։
Վերջինիս խոսքով՝ պատկան մարմինները պարզպես չեն աշխատում, եկել են վայելելու, իսկ այդ վայելքը կարող է կարճ տևել։
Հրդեհներից բացի «Ագրարագյուղացիական միավորում» ՀԿ-ի նախագահը խոսեց նաև անասնակերի թանկացման մասին՝ նշելով, որ նախորդ տարվա համեմատ այն թանկացել է երկու անգամ։
«Գյուղատնտեսությունն այսօր բարձիթողի վիճակում է, մի նախարարություն ունեինք, էդ էլ փակեցին, մինչև ե՞րբ կարելի է էսպես շարունակել։ Գյուղատնտեսական խնդիրները սրվել են։ Ապրանքի մթերման ծավալները նվազել են, միայն դեղձն է, որ այս տարի լավ բերք է տվել։ Խաղողի մթերումը պակասել է 30 տոկոսով, ծիրանը նույնպես պակաս է, իսկ բանջարեղենը նույնն է, ինչ անցյալ տարի։ Գարնանը կունենանք 500 դրամանոց կարտոֆիլ»,- նշեց նա։
Աղավնի Սուքիասյան
