09.12.2025 | 23:31
Եվրոպական հանձնաժողովը հետաքննություն է սկսել Google-ի դեմ
1 տրիլիոն 688 միլիարդի մեջ 5 միլիոնը մեծ գումար չէ. նախարարը՝ գորգերի լվացման միջոցառման մասին. ՏԵՍԱՆՅՈՒԹ
Տնտեսություն
22.08.2019 | 13:52
Եթե ծախսերը կատարվել են օրենքով սահմանված բոլոր կանոնները պահպանելով, ուրեմն ամեն ինչ նորմալ է: Կառավարության նիստից հետո լրագրողների հետ ճեպազրույցում նշեց ֆինանսների նախարար Ատոմ Ջանջուղազյանը՝ անդրադառնալով նրան, որ Վարդավառի տոնին ԱԺ բակում գորգեր լվանալու և անհրաժեշտ պարագաները ձեռք բերելու համար բյուջեից 5 մլն դրամ է հատկացվել:
Հարցին՝ որքանով էր նպատակահարմար նման ծախս անել, նախարարը պատասխանեց. «Նպատակի հարցը քննարկվում է այն ժամանակ, երբ քննարկվում է այդ ծախսը: Երբ այդպիսի ծախս է նախատեսվել, գնման առարկա է նախատեսվել, դրանով հիմնավորվել է նպատակայնությունը: Դուք հիմա ինձ հարցնում եք մի բան, որն անմիջականորեն ինձ չի վերաբերվում: Դա պետք է հարցնել այդ ծախսի պատասխանատու մարմնին»:
Դիտարկմանը, որ փող տվողը Ֆինանսների նախարարությունն է, Ջանջուղազյանը կատակով արձագանքեց. «Երբ ասում եք՝ փող տվողը դուք եք, ես սկսում եմ անհանգստանալ, որովհետև նախ փողը տալիս է ԱԺ-ն՝ բյուջեն հաստատելուց: Երկրորդ՝ տալիս է Կառավարությունը, երբ հաստատում է համամասնությունները, գնման պլանները, և երրորդ՝ տվյալ պետական մարմինը, որն իրականացնում է այդ միջոցառումը»:
Նախարարը նկատեց, որ այդ հարցի հասցեատերն ինքը չէ, իսկ դիտարկմանը, որ ինքը նաև ՀՀ քաղաքացի է և կարող է տեսակետ հայտնել, Ջանջուղազյանն ասաց. «Բայց դուք հիմա որպես քաղաքացի չեք ինձ կտտանքների ենթարկում»:
Նա նշեց, որ տեղին չէ տպավորությունը, որ ինքն ամեն մի առանձին վերցրած ծախսի մասին մտածում է: «Բյուջեում մոտ 1 տրլն 688 մլրդ դրամ ծախս է նախատեսված, գնման առարկաները հազարավորներն են: Հիմա 1 տրլն 688 մլրդ դրամ գումարի մեջ 5 մլն դրամն ամենանշանակալին չէ, բայց մեծ ու փոքրի տեսակետից ամեն մի դրամն էլ հաշվի է, որովհետև ենթադրվում է, որ ամեն մի դրամի դիմաց պետք է փորձել առավելագույն արդյունք ստանալ»,- ասաց Ատոմ Ջանջուղազյանը:
Մանրամասները՝ տեսանյութում:
Նարեկ Կիրակոսյան
