Քաղաքականություն
30.07.2019 | 17:56
Միանգամայն հավանական է, որ վեց օր առաջ անհետացած Ադրբեջանի ռազմաօդային ուժերի (ՌՕՈՒ) ՄիԳ-29 օդանավը կործանվել է Ռուսաստանի կողմից ռադիոէլեկտրոնային պայքարի համակարգերից մեկի կիրառման արդյունքում: Minval.az-ին այս մասին ասել է ադրբեջանցի ռազմական փորձագետ, պահեստի փոխգնդապետ Ուզեիր Ջաֆարովը՝ որպես օրինակ ներկայացնելով «Կրասուխա-4» և «Լեեր-3» համակարգերը:
Նրա խոսքով՝ ավելի վաղ Սիրիայում կիրառված այս համակարգերը կարող են հաճախությունների խափանումներ առաջացնել: Ջաֆարովը նշել է, որ ՆԱՏՕ-ի գեներալները բազմիցս դժգոհություն են հայտնել, որ դրանք խափանումներ են առաջացրել Դաշինքի օդանավերում:
««Կրասուխա-4» համալիրի գործողության հեռահարությունը գնահատվում է 150-300 կմ, սակայն ասում են՝ այն կրկնակի ավելացել է՝ հասնելով 600 կմ-ի: Բացի այդ՝ Ռուսաստանը չի թաքցնում, որ նման համակարգեր է օգտագործում: Նույն Սիրիայում այդ համակարգերը խափանել են միջազգային կոալիցիայի ուժերի առջև դրված խնդիրների կատարումը»,- ասել է փորձագետը:
Ջաֆարովը նշել է, որ կտրականապես դեմ է, որպեսզի կործանված ՄիԳ-29-ի «սև արկղը» ռուսական կողմին ուղարկվի՝ գաղտնազերծման:
«Ռուսաստանը շահագրգիռ կողմ է: Նույնիսկ 2008, 2010, 2011 թվականներից հետո, երբ մեր ՌՕՈՒ-ի թռչող սարքերը կործանվեցին, մինչ օրս մեզ ուսումնասիրության արդյունքներ չեն ներկայացրել: Չնայած պարտավոր էին: Հարկավոր է հասնել նրան, որ «սև արկղի» գաղտնազերծումը կատարվի այնպիսի երկրում, որին մենք վստահում ենք: Ռուսաստանը երբեք Ադրբեջանի հանդեպ անկեղծ չի եղել: Չի կարելի ՄիԳ-29-ի «սև արկղը» Մոսկվա ուղարկել»,- ասել է ադրբեջանցի փորձագետը:
Նշենք, որ հուլիսի 24-ին ուսումնամարզական թռիչքի ժամանակ կործանված ՄիԳ-29-ը գտնելու համար Բաքուն օգնություն է խնդրել Անկարայից: Երկրի Պաշտպանության նախարարությունը տեղեկացրել է, որ Թուրքիայից մասնագետներն առաջիկայում կժամանեն Ադրբեջան:
