«Այսօր տաք-տաք ասֆալտ էին փռում, որ վաղվան հասցնեն». վարչապետի այցից մի քանի ամիս հետո էլ «կաբլուկներով» Տիգրան Մեծ փողոցով քայլել չի եղել

Հուլիսի 20-ին Գյումրիում նախատեսված է «Իմ քայլը հանուն Շիրակի մարզի» բիզնես համաժողովը: Factor.am-ն այսօր գրել էր, որ ֆորումին ընդառաջ՝ ակտիվ նախապատրաստական աշխատանքներ են ընթանում, վերջին շտկումներն են արվում:

Factoram-ը տեղեկացավ, որ համաժողովի նախապատրաստական աշխատանքներից զատ վերջին օրերին Գյումրիում հատկապես ակտիվացել է փողոցաշինությունը: Գյումրու ավագանու «Գալա» խմբակցության անդամ Քրիստինա Մկրտչյանը մեզ հետ զրույցում ասաց, որ մինչեւ այսօրվա վերջը ամբողջությամբ ավարտված չէր Տիգրան Մեծի փողոցի ասֆալտապատումը:

Հիշեցնենք՝ սա հենց այն փողոցն է, որի հետ կապված վարչապետ Նիկոլ Փաշինյանը ապրիլի 5-ին Գյումրի կատարած աշխատանքային այցի ժամանակ խիստ նկատողություն տվեց Գյումրու քաղաքապետ Սամվել Բալասանյանին եւ Շիրակի մարզպետ Տիգրան Պետրոսյանին՝ փողոցի անմխիթար վիճակի պատճառով:
«Մայթը որ քանդում եք, մտածո՞ւմ եք, օրինակ, կաբլուկով, կանայք ո՞նց են քայլելու: Իմ ասածն այն է, որ շինարարություն սկսելուց առաջ պետք է մտածել միջավայրի մասին։ Եթե այս շինարարությունը մի տարի տևի, մարդկանց ասենք՝ գնացեք ուրիշ տեղ ապրեք, մեկ տարուց հետ կգա՞ք»,- բարկացել էր վարչապետը:
Factor.am-ը ավագանու անդամ Քրիստինա Մկրտչյանից հետաքրքրվեց՝ արդյո՞ք «կաբլուկով» կանայք կարող են այդ փողոցով անցնել:

«Հենց այսօր եմ այդ փողոցով անցել, այսօր նոր ինչ-որ բաներ էին անում: Վերջին մեկ շաբաթում է, որ սկսել են գործ անել, վարչապետի այցից հետո շիբինապատեցին եւ այդ վիճակում մնաց: Այսօր տեսա, որ տաք-տաք ասֆալտ են փռում, որ երեւի վաղը հասցնեն: Արագ-արագ աղբն էին հավաքում, իսկ դեպի Հայուհու հրապարակ տանող հատվածում դեռ որեւէ բան էլ չէին հասցրել անել: Չեմ զարմանա, որ գիշերն էլ անեն, որ մինչ վաղը հասցնեն: Վերջին մեկ շաբաթում են սկսել ինտենսիվ աշխատել»,- ասաց նա:

Նարեկ Կիրակոսյան