Ինչո՞ւ չեղարկվեց Սևանա լճի տնտեսվարողների պլանավորած բողոքի ակցիան

Սևանի ափամերձ տարածքների տնտեսվարողներն այսօր բողոքի ակցիա չեն անի․ հարցը լուծված է։ Այս մասին Factor.am-ի հետ զրույցում ասաց «Սևան ազգային պարկի» տնօրեն Վահե Գուլանյանը։

«Սևանի ափամերձ տարածքների տնտեսվարողներն այսօր բողոքի ակցիա չեն արել, նրանց խոսքով՝ խնդիրը լուծված է, ուստի իրենք շարունակելու ենք իրենց բնականոն գործունեությունը։ Իսկ ինչ վերաբերում է ջրի ծաղկմանը, ապա պետք է ասեմ, որ արդեն երեք օր է՝ այն դադարել է․ ծաղկման գործընթացը տևում է ընդամենը 15 օր, ինչի մասին էլ մենք ասում էինք ու հորդորում՝ հարցն այդպես չշահարկել»,- ասաց «Սևան ազգային պարկի» տնօրենը։

Գուլանյանը նշեց, որ Սևանա լճից ջրի նմուշ վերցրած և այն փորձաքննության ենթարկած կենտրոնները ևս ընդունում են, որ Սևանի վիճակն այնպիսին չէ, ինչպիսին ներկայացնում են, սակայն կա տպավորություն, որ պարզապես չեն ցանկանում դրա մասին բարձրաձայնել։

Հարցին՝ իսկ արդյոք ինքն այսօր մասնակցո՞ւմ է ԱԺ «Բարգավաճ Հայաստան» խմբակցության հրավիրած քննարկմանը՝ «Սևանա լճի հիմնախնդիրները և դրանց լուծման ուղիները» թեմայով, «Սևան ազգային պարկի» տնօրենը պատասխանեց․ «Ոչ, ինձ չեն հրավիրել»։

Հիշեցնենք, որ հուլիսի 15-ին Սևանա լճի ափամերձ շինությունների սեփականատերերը Սևանի քաղաքապետարանի դիմաց բողոքի ակցիա անցկացրին՝ հայտարարելով, որ հանգստի սեզոնին կրել են մեծ վնասներ, քանի որ մարդիկ վախենում են ջրում լողալ ու նախընտրում են իրենց հանգիստն անցկացնել այլ վայրերում։

Տնտեսվարողները նաև պահանջեցին, որ Գեղարքունիքի մարզպետն ու այլ պաշտոնյաներ անձամբ լողան լճում՝ ապացուցելով, որ այն անվտանգ է, ինչն էլ ավելի ուշ իրականություն դարձավ։

Սևանում ուղիղ եթերում լողացին Գեղարքունիքի մարզպետ Գնել Սանոսյանը, «Սևան ազգային պարկի» տնօրեն Վահե Գուլանյանն ու Սևանի քաղաքապետ Սարգիս Մուրադյանը։

Առողջապահության նախարար Արսեն Թորոսյանն էլ իր ֆեյսբուքյան էջով երեկ հայտնեց, որ Սևանա լճի 11 տարբեր տարածքներից երեկ վերցված ջրի փորձանմուշների հետազոտությունը ցույց է տալիս, որ լճի ինքնամաքրման գործընթացը շարունակվում է: Իսկ Շրջակա միջավայրի նախարարությունից էլ տեղեկացրին, որ Սևանա լճում ավարտված է ջրիմուռների աճման շրջանը և ներկայումս լճի թափանցիկությունը կտրուկ աճել է. հունիսի 30-ին դիտված միջին 2մ-ից հասնելով 6.5մ-ի, որոշ տեղերում՝ մինչև 9 մ-ի: Նշված ցուցանիշը 2018-19 թթ.-ին արձանագրված ամենաբարձր ցուցանիշն է:

Աղավնի Սուքիասյան