03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Տիգրան Ավինյանը Շարժայի կառավարական պատվիրակության հետ քննարկել է գործարար կապերի զարգացման հնարավորությունները
Քաղաքականություն
28.06.2019 | 22:15
ՀՀ փոխվարչապետ Տիգրան Ավինյանը հունիսի 28-ին ընդունել է Հայաստանում գտնվող ԱՄԷ Շարժայի էմիրության պատվիրակությանը՝ կառավարական հարցերով գործադիր նախագահ Շեյխ Ֆահիմ ալ Քասիմիի գլխավորությամբ: Հանդիպման ընթացքում քննարկվել են Շարժայի էմիրության հետ Հայաստանի գործարար կապերի զարգացման հնարավորությունները:
Ինչպես տեղեկացրին ՀՀ փոխվարչապետ Տիգրան Ավինյանի գրասենյակից, ողջունելով հյուրերին՝ ՀՀ փոխվարչապետը կարևորել է Արաբական ծոցի տարածաշրջանի, այդ թվում՝ ԱՄԷ-ի հետ առևտրատնտեսական հարաբերությունների խորացումը: Նա ներկայացրել է ՀՀ տնտեսության մեջ տեղի ունեցող դրական տեղաշարժերը և ներդրումային միջավայրի բարելավման նպատակով իրականացվող քայլերը:
Շնորհակալություն հայտնելով ընդունելության համար՝ Շեյխ Ֆահիմ Ալ-Կասիմին նշել է, որ ինքը մեծ ներուժ է տեսնում մի շարք ուղղություններով հայկական կողմի հետ փոխշահավետ նախաձեռնությունների իրականացման համար: Շարժայի կառավարության ներկայացուցիչը ՀՀ փոխվարչապետին է տեղեկացրել գործակցության առավել շահութաբեր ոլորտների վերհանման նպատակով իրականացվող աշխատանքների մասին:
Զրուցակիցները անդրադարձել են սննդի անվտանգության, ջրային ոլորտի, գյուղատնտեսության, թափոնների կառավարման, տեղեկատվական տեխնոլոգիաների, զբոսաշրջության, կրթության, մշակույթի և մի շարք այլ ուղղություններով համագործակցության մեխանիզմների մշակմանը: Պայմանավորվածություն է ձեռք բերվել աշխատանքային խմբի շրջանակում շարունակել քննարկումները գործնական առաջարկությունների ներկայացման նպատակով:
