Ատելության խոսքի տարածման մեջ ներդրում ունեն թե՛ իշխանական, թե՛ ընդդիմադիր գործիչները․ Բորիս Նավասարդյան. ՏԵՍԱՆՅՈՒԹ

Այսօր հասարակական հարաբերությունները սրված են ավելի շատ, քան անցյալ տարիներին, ասում է Երևանի մամուլի ակումբի նախագահ Բորիս Նավասարդյանը: Նա օրինաչափ է համարում, որ քաղաքական լարված դրությունը արտացոլվում է նաև լրատվադաշտում։

Ըստ նրա՝ ատելության խոսքի դեմ պայքարում կարելի է հաջողել՝ այդպիսի կոչերն իրավական գնահատականի արժանացնելով։

«Միջազգային պրակտիկայում կան հետաքրքիր նախադեպեր, որոնք կարելի է կիրառել, և եթե ատելության խոսքը քրեականացնելու միտում կա, ապա շատ կարևոր է այնպիսի սահմանում գտնել դրա համար, որը համարժեք կլինի գործողությանը։ Եթե մենք քրեականացնելու խնդիր ենք դնում, ապա կարևոր է հստակեցնել՝ խոսքը գնում է այն ատելության խոսքի մասին, որն իր մեջ ներառում է արդեն եղած քրեական պատասխանատվության ենթարկվելիք գործողություններ, ինչպիսին է ռասսայական խտրականությունը։ Եվ այստեղ պետք է դիտարկել բռնության կոչերը որպես քրեականացման ենթակա ոլորտ։ Դա լուրջ իրավաբանների գործ պետք է լինի, հապշտապ գործողություններն այստեղ չեն կարող օգտակար լինել»,- ասաց ԵՄԱ նախագահը։

Բորիս Նավասարդյանը համոզված է, որ ատելության խոսքի տարածմանն օժանդակում են թե՛ իշխանական, թե՛ ընդդիմադիր գործիչները հավասարապես։ Քաղաքական բանավեճում օգտագործվող բառապաշարը հաճախ է անցնում թույլատրելի սահմանը։ Որպես պայքարի միջոց պարտադիր է իրավական կարգավորումներն ու դատարանների աշխատանքն արդյունավետ դարձնելը, և գլխավորապես՝ լրատվամիջոցների ինքնակարգավորման մեխանիզմների զարգացումը։

Մանրամասները՝ տեսանյութում:

Ռոբերտ Անանյան