15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Թուրքական զինուժը հարվածներ է հասցրել Իդլիբում սիրիական բանակի դիրքերի ուղղությամբ
Քաղաքականություն
28.06.2019 | 17:09
Թուրքիայի ԶՈՒ-ն սիրիական Իդլիբ նահանգում թուրքական դիտակետի վրա հարձակումից հետո ռմբակոծել է սիրիական բանակի դիրքերը: Այս մասին գրում է Anadolu գործակալությունը՝ վկայակոչելով Թուրքիայի ՊՆ հայտարարությունը, հաղորդում է ՏԱՍՍ-ը:
«Ռեժիմի (Սիրիայի նախագահ Բաշար Ասադի) կրակակետերը հզոր հարվածի են ենթարկվել»,- հայտարարել են Թուրքիայի ՊՆ-ում:
Անկարան նման քայլի է դիմել՝ Իդլիբում Թուրքիայի ԶՈՒ-ի 12 դիտակետերից մեկի վրա հարձակման արդյունքում 1 թուրք զինծառայողի զոհվելուց և 3-ի վիրավորելուց հետո: Թուրքիան պնդում է, որ «կանխամտածված գնդակոծություն է իրականացվել սիրիական ռեժիմի վերահսկողության ներքո գտնվող շրջանի ուղղությամբ»:
Կատարվածի առնչությամբ Թուրքիայի ԶՈՒ գլխավոր շտաբ է հրավիրվել Անկարայում ռուսական ռազմակա կցորդը՝ միջադեպը քննարկելու համար: Անկարան նաև խոստացել է «պատասխանել նման հարձակումներին»:
2017 թվականի մայիսին Աստանայում (այժմ՝ Նուր Սուլթան) ՌԴ-ի, Իրանի և Թուրքիայի ներկայացուցիչների մասնակցությամբ տեղի ունեցած բանակցությունների արդյունքում ձեռք բերված պայմանավորվածությամբ՝ Սիրիայում դեէսկալացիայի չորս գոտի է ստեղծվել: Դրանցից երեքը 2018 թվականին անցել են Դամասկոսի վերահսկողությանը: Իդլիբում և հարևան Լաթաքիա, Համա և Հալեպ նահանգներում գտնվող չորրորդ գոտին դեռևս երկրի կառավարության հսկողության ներքո չէ, ընդ որում՝ դրա մեծ մասը գրավել են «Ջեբհաթ ան-Նուսրա» ահաբեկչական կազմակերպության զինյալները:
