13.11.2024 | 23:28
Էրդողանը Թրամփի հետ հանդիպման հույս է հայտնել և խոսել Մասկի հետ համագործակցելու ցանկության մասին
Թրամփը խոստացել է հզոր՝ ոչնչացնող հարված հասցնել Իրանին
Քաղաքականություն
26.06.2019 | 12:22
ԱՄՆ-ի դեմ Իրանի ցանկացած հարվածին Սպիտակ տան ղեկավար Դոնալդ Թրամփը խոստացել է պատասխանել հզոր՝ ընդհուպ ոչնչացնող հարվածով:
«Ամերիկյան ինչ-որ բանի վրա Իրանի ցանկացած հարձակում կհանդիպի հզոր և ճնշող ուժի: Որոշ ոլորտներում ճնշողը կնշանակի ոչնչացում»,- Twitter-ում գրել է ԱՄՆ նախագահը, հաղորդում է Euronews-ը:
Նա հավելել է, որ այլևս չկա ոչ մի «Ջոն Քերրի և Օբամա»՝ նկատի ունենալով իր նախորդին և նախկին պետքարտուղարին, որոնք 2015 թվականին Իրանի հետ միջուկային գործարք կնքեցին, իսկ Թրամփի որոշմամբ անցյալ տարվա մայիսին Վաշինգտոնը հրաժարվեց դրանից:
Թրամփն այս կերպ արձագանքել է Իրանի ղեկավարության և բարձրաստիճան զինվորականների նկատմամբ ամերիկյան պատժամիջոցներից հետո այդ երկրի նախագահ Հասան Ռոհանիի հայտարարությանը: Վերջինն ասել էր, թե ամերիկյան վարչակազմը «հոգեկան խանգարում» ունի:
Ավելի վաղ ԱՄՆ պետքարտուղար Մայք Պոմպեոն հաստատել էր նախագահ Թրամփի ծրագրին հավատարմությունը: «Իրանի արտահայտությունները փոքր-ինչ մանկական են և ոչ հասուն, բայց իմացեք, որ Միացյալ Նահանգներն անսասան է»,- ասել է Պոմպեոն:
Նշենք, որ Իրանի և ԱՄՆ-ի՝ առանց այն էլ լարված հարաբերություններն առավել սրվեցին Թեհրանի կողմից ամերիկյան անօդաչու սարքը խոցելուց հետո: Դրանից հետո Թրամփը հայտարարեց, որ հավանություն է տվել Իրանին հարվածելուն, բայց վերջին պահին փոխել է միտքը:
