02.09.2026 | 20:27
Վահագն Խաչատուրյանը պաշտոնական այցով ժամանել է Պրահա. ՏԵՍԱՆՅՈՒԹ
20-ամյա աղջիկը գնացել էր իրեն կամրջից նետելու, միտքը փոխել է, զանգել ոստիկանություն. Արման Թաթոյանը մի պատմություն ներկայացրեց. ՏԵՍԱՆՅՈՒԹ
Հասարակություն
26.06.2019 | 12:03
Քրեակատարողական համակարգում՝ փակ հաստատություններում կամ ազատությունից զրկման վայրերում, կան տարիներով կուտակված խնդիրներ։ Մեր ՔԿՀ-ները պահպանում են պատժիչ բնույթը, այլ ոչ թե վերականգնողական արդարադատության համակարգին բնորոշ հատկանիշները։ «Անցումային արդարադատության համատեքստում խոշտանգումների զոհերի իրավունքների վերականգնման մեխանիզմները» թեմայով հանրային քննարկմանն ասաց Հայաստանի մարդու իրավունքների պաշտպան Արման Թաթոյանը։
«ՔԿՀ-ում չկա անհատական մոտեցում ազատությունից զրկված անձի նկատմամբ։ Պետք է ապահովվի մարդու մասնակցությունը՝ իրեն վերաբերվող որոշման կայացմանը։ Նրան պետք է պարզ լինի՝ ինչ պետք է անի, որպեսզի հասնի ազատ արձակմանը»,- հավելեց Թաթոյանը:
Օմբուդսմենը պայմանական վաղաժամկետ ազատ արձակման ինստիտուտի մասին խոսելով՝ նշեց, որ պատժի կրման ամբողջ ժամանակահատվածում անձի հետ ոչ մի աշխատանք չի տարվում, իսկ վերջում ասվում է՝ ներողություն, դուք պատրաստ չեք ազատության. «Հարց է առաջանում՝ ինչո՞ւ պետք է մարդը զրկանքներ կրի, ինչ է թե՝ պետությունը բավարար ջանքեր չի գործադրել՝ իրեն պատրաստելու ազատության, և հիմա էլ մենք պայմանական վաղաժամկետ ազատ արձակման ժամանակ մերժում ենք նրան»։
Արման Թաթոյանն անդրադարձավ տեսակցությունների արգելքի խնդրին: «Հիմա մեր գործընկերների հետ որոշակի վիճաբանության մեջ ենք, որ կոնկրետ նշվի այն մարդու անունը, որի հետ տեսակցությունն առաջարկվում է արգելափակել։ Մենք հասկանում ենք նաև քննության իրավաչափ շահը, բայց, ամեն դեպքում, սա ապահովման ենթակա արժեք է»,- նշեց պաշտպանը։
Օմբուդսմենը մի երիտասարդ աղջկա պատմությունը ներկայացրեց՝ իրազեկման պակասը ցույց տալու համար: «20-ամյա աղջիկը գնացել էր իրեն կամրջից նետելու, միտքը փոխել է, զանգել ոստիկանություն: Ոստիկանները, շտապօգնությունը եկել են և, չգիտես ինչու, մարդուն տարել հոգեբուժական հաստատություն։ Այդ աղջիկը չափահաս և գործունակ աղջիկ է: Հայտնվելով հոգեբուժական կազմակերպությունում՝ նրան թուղթ էին տվել, ստորագրել էր, թե ինքը համաձայն է, որ իրեն բուժեն։ Բայց երբ գլխի է ընկել՝ հոգեբուժական կազմակերպությունում է, թղթեր է ստորագրել՝ իրեն ազատ արձակելու, բայց չէին ազատում՝ պնդելով, որ նրա ծնողը գնա։ Մենք այցելեցինք և պահանջեցինք ազատ արձակել։ Աշխատանքից ազատված տնօրենը բժիշկներին հավաքել, եկել էր մեր դեմ բողոք անելու»,- պատմեց Արման Թաթոյանը։
Մանրամասները՝ տեսանյութում:
Ռոբերտ Անանյան
