Հասարակություն
10.06.2019 | 15:10Հայաստանի առողջապահության նախարար Արսեն Թորոսյանի փաստաբան Գևորգ Գյոզալյանը պնդում է, որ դատարանը սուբյեկտիվ է վարվել՝ նախարարին պարտավորեցնելով ներողություն խնդրել «Սուրբ Գրիգոր Լուսավորիչ» ԲԿ-ի նախկին տնօրեն Արա Մինասյանից։ Այսօրվա հրավիրված ասուլիսում այս մասին ասաց ՀՀ առողջապահության նախարարի փաստաբան Գևորգ Գյոզալյանը։
«Դատարանը մեզ բավարար լծակներ չի թողել, որ պաշտպանենք մեր դիրքորոշումը հավասարության ու արդարության սկզբունքով։ Ընդ որում՝ Թորոսյանը բժշկական կենտրոնում չարաշահումների մասին հայտարարություններ անելու հիմքեր ուներ»,- նշեց փաստաբանը:
Հիշեցնենք, որ հունիսի 8-ին Երևանի ընդհանուր իրավասության դատարանը, դատավոր Սուրեն Երիցյանի նախագահությամբ, բավարարել է «Սուրբ Գրիգոր Լուսավորիչ» ԲԿ-ի նախկին տնօրեն Արա Մինասյանի հայցն ընդդեմ առողջապահության նախարար Արսեն Թորոսյանի և պարտավորեցրել նրան ներողություն խնդրել Սերժ Սարգսյանի խնամուց:
Դատարանը պարտավորեցրել է նախարարին հաստատել իր արած հայտարարությունները, սակայն համապատասխան նյութերը քննչական մարմնի մոտ են: Վերջինը հրաժարվել է տրամադրել դրանք Թորոսյանին ու փաստաբանին՝ ելնելով քննության գաղտնիության նկատառումներից։ Երբ պաշտպանական կողմը դատարան է դիմել՝ քննությունից ապացույցները պահանջելու խնդրանքով, դատարանը մերժել է:
Փաստաբանն անհեթեթ է համարում, որ դատարանը պարտավորեցրել է ներողություն խնդրել ոչ միայն Թորոսյանին, այլև գերատեսչությանը, որն այս դեպքում գործի հետ կապ չունի: Դատարանը մերժել է պարզաբանումներ տալու նպատակով Մինասյանին հարցաքննելու՝ փաստաբանների առաջարկը։ Փաստացի, Գյոզալյանի խոսքով, դատարանը պաշտպանական կողմին թողել է առանց սեփական դիրքորոշումը պաշտպանելու միջոցների ու մեխանիզմների։
Փաստաբանն ասաց, որ իրենք մտադիր են բողոքարկել դատարանի որոշումը, նաև քննարկվում է դատարանին կարգապահական պատասխանատվության ենթարկելու նպատակով Արդարադատության խորհուրդ դիմելու հարցը:
Մանրամասները՝ տեսանյութում:
Նարեկ Կիրակոսյան
