12.12.2025 | 00:34
Բռնցքամարտի ԱԱ․ Ռուդոլֆ Գարբոյանն ու Դավիթ Չալոյանը` բրոնզե մեդալակիրներ. ՏԵՍԱՆՅՈՒԹ
Լիլիթ Մակունցը նկատողություն է արել «Իմ քայլի» պատգամավորներին. պատճառը հայտնի է
Քաղաքականություն
06.06.2019 | 22:44
Ազգային ժողովի «Իմ քայլը» խմբակցության ղեկավար Լիլիթ Մակունցը հերթական անգամ իշխող թեւի պատգամավորներին նկատողություն է արել լիագումար նիստերից բացակայելու համար։ Մասնավորապես, վերջին քառօրյայի նիստերին, որն օրակարգի հագեցվածության պատճառով դարձավ վեցօրյա, ակնառու է եղել «Իմ քայլի» պատգամավորների բացակայությունը:
Factor.am-ի աղբյուրները փոխանցեցին, որ Լիլիթ Մակունցը պատգամավորների նմանօրինակ պահվածն անընդունելի է համարել:
Խմբակցության ղեկավարը բավականին կոշտ դիտողություն է արել: Նա հստակ ասել է, եթե պատգամավորները գործուղման չեն եւ բացակայելու համար նախապես թույլտվություն չունեն, ապա առանց բացառության պետք է մասնակցեն լիագումար նիստերին:
Լիլիթ Մակունցի կողմից արված նկատողության մասին «Իմ քայլը» խմբակցության պատգամավոր Նազելի Բաղդասարյանը Factor.am-ի հետ զրույցում ասաց. «Եթե հարց է քննարկվում եւ պատգամավորը պետք է ելույթ ունենա, տրամաբանական է, որ պետք է դահլիճում լինի, բայց երբեմն այնպիսի անհամատեղելի աշխատանքներ են լինում, որ պատգամավորի բացակայությունից խնդիր չի կարող ծագել: Հնարավոր է՝ ցերեկվա ինչ-որ ժամերին բացակայեն, բայց երեկոյան էլի նիստերի դահլիճում լինեն: Այս ընթացքում աշխատանքները խսիտ ծանրաբեռնված են»:
«Իմ քայլի» մեկ այլ պատգամավորից՝ Սոս Ավետիսյանից էլ հետաքրքրվեցինք, թե ինչու՞ խմբակցության պատգամավորները չեն ցանկանում նիստին ներկա գտնվել, որ խմբակցության ղեկավարը նկատողություն է անում:
«Ես չեմ կարծում, որ լիագումար նիստերին չեն ուզում ներկայանան պատգամավորները: Այս խորհրդարանը էականորեն տարբերվում է մյուս խորհրդսրաններից՝ հենց ակտիվությամբ: Լինում են դեպքեր, որ մարդիկ դուրս են գալիս, ներս են գալիս, բայց ընդհանուր առմամբ խմբակցությունը հնարավորինս այստեղ է լինում»:
Դիտարկմանը, որ խմբակցության ղեկավարն անընդունելի է համարել նիստին պատգամավորների բացակայությունը, Սոս Ավոտիսյանն արձագանքեց.
«Համաձայն եմ դրա հետ, դա եզակի դեպք է՝ կապված տարբեր փաստերի հետ: Վերջին նիստը տեւեց մինչեւ ժամը ութը, բայց յոթին կար կարեւոր միջոցառում, որին որոշ պատգամավորներ գնացին: Այն պահը, երբ մենք խորհրդարանում ենք, ավելի ակնառու է»:
Նշենք, որ սա առաջին դեպքը չէ, որ խմբակցության ղեկավարը իշխանական թեւի պատգամավորներին նկատողություն է անում խորհրդարանական աշխատանքին թերի մասնակցություն ցուցաբերելու համար:
Մեկ ամիս առաջ էլ գրել էինք, որ Լիլիթ Մակունցը «Իմ քայլի» պատգամավորներին նկատողություն է արել խմբակցության նիստին չներկայանալու համար:
Ի դեպ, մի քանի օր առաջ էլ Factor.am-ն էր ֆիքսել, որ ԱԺ լիագումար նիստն ընթանում է կիսադատարկ դահլիճում:
Նարեկ Կիրակոսյան
