02.07.2026 | 10:25
Ուրսուլա ֆոն դեր Լայենը ժամանեց Երևան
Կալիֆոռնիայի նահանգային սենատը Հայաստանում առևտրային գրասենյակ բացելու օրինագիծ է ընդունել
Տնտեսություն
23.05.2019 | 18:29
Կալիֆոռնիայի նահանգային սենատն ընդունել է օրինագիծ, ըստ որի, Կալիֆոռնիայի և Հայաստանի միջև առևտրային գրասենյակ կբացվի։ Այս մասին տեղեկացնում է Asbarez-ը։ Օրինագիծը ներկայացվել է սենատոր Էնթոնի Պորտանտինոյի նախաձեռնությամբ:
«Մեր առաջնահերթություններից մեկը Հայաստանի և Կալիֆոռնիայի միջև տնտեսական, հատկապես՝ ՏՏ, զբոսաշրջության, բիոտեխնոլոգիայի ոլորտներում, հնարավորությունների բարձրացումն է։ SB 302 օրինագիծը Կալիֆոռնիայի և Հայաստանի միջև առևտրային և տնտեսական կապերն ավելի պաշտոնական կդարձնի։ Ինձ համար, որպես ԱՄՆ-ում հայկական ամենամեծ համայնքի ներկայացուցիչ, մեծ պատիվ է և ուրախություն, որ այս օրինագիծը Սենատում առաջ է գնում։ Անհամբեր սպասում եմ առևտրային գրասենյակի բացմանը։ Կալիֆոռնիան տնտեսական ոլորտի առաջատարն է, իսկ հայկական համայնքը՝ մեր հաջողության կարևոր բաղկացուցիչը: Սա օգտակար կլինի թե՛ Կալիֆոռնիայի, թե՛ Հայաստանի համար»,- նշել է Պորտանտինոն։
Առևտրային գրասենյակը կգտնվի Հայաստանում և կծառայի Կալիֆոռնիայի և Հայաստանի միջև տնտեսական, առևտրային կապերի զարգացմանը:
Հիշեցնենք, որ ավելի վաղ նահանգային սենատն այսպիսի գրասենյակ հիմնելու որոշում էր ընդունել, սակայն Կալիֆոռնիայի նախկին նահանգապետ Առնոլդ Շվարցնեգերը 2007թվականին այն չեղարկել էր։
Նելլի Մելքոնյան
