Փաստաբանը հին տրամաբանության մեջ է մնացել. Ալեն Սիմոնյանը՝ Դավիթ Սանասարյանի փաստաբանին. ՏԵՍԱՆՅՈՒԹ

Մարդիկ ազատ են նշել այն, ինչը իրենց հետաքրքիր է: Այսօր ԱԺ-ում լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ անդրադառնալով այն հարցին, որ երկու օր Երևանում նշվել է մարիխուանայի միջազգային օրը:

Խոսելով Քաղաքացու օրվա միջոցառումների մասին, Ալեն Սիմոնյանը հիշեցրեց, որ մեկ տարի առաջ այս օրը ձերբակալվել են Նիկոլ Փաշինյանը, Արարատ Միրզոյանն ու Սասուն Միքայելյանը, իսկ ինքը իր մի քանի թիմակիցներով պայքարել է ժողովրդի հետ:

Մեր հարցին, որ բազմաթիվ կարծիքներ կան, որ այդ Քաղաքացու օրվա միջոցառումները կազմակերպելու համար տրամադրված 124 մլն-ը կարելի էր ավելի արժեքավոր նպատակների համար ծախսել, պատգամավորն ասաց. «Ես լսել եմ հակառակ կարծիքներ, որ այո՛, պետք է նշենք: Սա հերթական միջոցառումը չէ, սա կարևոր իրադարձության արձանագրում է»:

ԱԺ փոխնախագահն ասաց, որ այսօր քննարկվելու է նաև Մարտի 1-ի զոհերի ընտանիքներին աջակցություն ցուցաբերելու օրենքի նախագիծը:  Իսկ թե այն իրենից ինչ է ենթադրում Ալեն Սիմոնյանն ասաց, որ նախագիծը ներկայացնելիս կասի:

Ապա անդրադառնալով Դավիթ Սանասարյանին մեղադրանք առաջադրելու գործին՝ հայտարարեց, որ այսօր ունենք իրավապահ համակարգ, որին վստահում են բոլորը: Մեր հարցին, եթե պարզվի, որ Դավիթ Սանասարյանը ներգրավված է եղել կոռուպցիոն գործարքներում, որքանով այն կվնասի հեղափոխությանը, Սիոմնյանն ասաց. «Վնաս կտա, որովհետև ինձ համար շատ ցավալի կլինի: Չեմ ուզում այդ մասին խոսել, որովհետև դա ինձ համար տհաճ թեմա է»:

Մեր դիտարկմանը, որ պառակտում է նկատվում, մասնավորապես՝ կան Դավիթ Սանասարյանի աջակիցներ և Արթուր Վանեցյանի աջակիցներ, Ալեն Սիմոնյանը մեկնաբանեց. «Արթուր Վանեցյանը վարչապետին կից հիմնարկի տնօրեն է: Նա քաղաքական միավոր չէ: Կա պետություն և կա օրենսգիրք»:

Հարցին, որ Դավիթ Սանասարյանի փաստաբանը հայտարարում է, որ նրա վրա գործ են սարքել, Ալեն Սիմոնյանը հայտարարեց, որ այդ փաստաբանը հին տրամաբանության մեջ է մնացել:

Մանրամանսերը՝ տեսանյութում:

Նարեկ Կիրակոսյան