Արմավիրի մարզում կայացել է Հայաստանի ազգային հավաքականի նախկին դարպասապահ Ռոման Բերեզովսկու անվան մանկապատանեկան ֆուտբոլային մրցաշարը։ Ավանդույթի համաձայն՝ եզրափակիչ խաղերն անցկացվում են նախորդ տարվա հաղթող թիմի մարզում. 2025 թվականին մրցաշարի գավաթը նվաճել էր Սարդարապատի միջնակարգ դպրոցի թիմը, հաղորդում է ՀՖՖ մամուլի ծառայությունը:
Այս տարի առաջնությանը մասնակցել են ՀՖՖ դպրոցական առաջնության մինչև 12 տարեկանների մարզային հաղթողները՝ 11 դպրոցական թիմ Հայաստանի 10 մարզից և Երևանից:
ՀՖՖ նախագահի խորհրդական, Մասսայական և սիրողական ֆուտբոլի բաժնի պետ Արթուր Սահակյանը կարևորել է նման մրցաշարերի անցկացումը։
«Մեծապես կարևորում ենք նման միջոցառումների անցկացումը, քանի որ դրանք նպաստում են երեխաների շրջանում մասսայական ֆուտբոլի տարածմանն ու նոր տաղանդների բացահայտմանը: Միաժամանակ, այս մրցաշարով հարգանքի տուրք ենք մատուցում մեր լեգենդար ֆուտբոլիստ Ռոման Բերեզովսկուն»,- ընդգծել է Արթուր Սահակյանը:
Մրցաշարի նպատակների և պատանի մարզիկների անելիքների մասին խոսել է նաև Ռոման Բերեզովսկին։
«Մրցաշարի նպատակն է ֆուտբոլի միջոցով միավորել երեխաներին, օգնել նրանց ձեռք բերել նոր ընկերներ և ամուր կապեր հաստատել: Միաժամանակ, հույս ունենք բացահայտելու տաղանդների, որոնք ապագայում կհաջողեն սպորտում: Իսկ դրա համար կարևոր է նվիրված լինել ֆուտբոլին, պայքարել մինչև վերջ, հավատալ սեփական ուժերին և անդադար աշխատել երազանքներն իրականացնելու համար», – նշել է անվանի դարպասապահը:
Մրցաշարի հատուկ հյուրն էր Ռուսաստանի հավաքականի և Մոսկվայի «Սպարտակի» նախկին կիսապաշտպան Դենիս Գլուշակովը։
«Տղաների հետ վարպետության դաս անցկացրի. նրանց բազմաթիվ վարժություններ ու առաջադրանքներ ցույց տվեցի, ապա ինքս էլ խաղացի նրանց հետ։ Թեև պրոֆեսիոնալներ չեն, բայց կան տեխնիկապես պատրաստված և հեռանկարային խաղացողներ։ Իմ խորհուրդը մեկն է՝ մեծ ֆուտբոլում հաջողելու համար նրանք պետք է հնարավորինս շատ ժամանակ անցկացնեն դաշտում և ջանասիրաբար մարզվեն։ Առանց քրտնաջան մարզումների ոչինչ չի ստացվի»,- ասել է Դենիս Գլուշակովը։
