Քաղաքականություն
16.04.2019 | 21:36Factor.am-ի հարցազրույցը ՀՀ առողջապահության նախարար Արսեն Թորոսյանի հետ
– Պարո՛ն Թորոսյան, կարո՞ղ եք թվարկել Ձեր պաշտոնավարման այս կարճ ժամանակահատվածում ձեռքբերումներն ու անհաջողությունները:
– Դրանք որոշակի նոր ծրագրերի ներդրումն են՝ նույն կաթվածի բուժման, սոցիալապես անապահով քաղաքացիների համար նոր փաթեթի ներդրումը, բայց անելիքներն այնքան շատ են, որ եթե բավարարվենք արածով, նոր բաներ չենք ցանկանա անել:
– Իսկ ի՞նչը չստացվեց Ձեզ մոտ:
– Եթե համարենք, որ ես վաղը հրաժարական եմ տալիս, կարելի է ասել, թե ինչը չի ստացվել: Այն, ինչ պլանավորել ենք ժամանակի ընթացքում, շարունակում ենք անել։ Եթե համարենք, որ ժամանակը վերջացել է, կարող ենք խոսել անհաջողության մասին: Օրինակ՝ դեռ չի հաջողվել ներդնել առողջապահական ապահովագրություն, որովհետև դա 2021 թ. ենք անելու, կամ բոլոր հաշմանդամների առողջապահական խնդիրները, որովհետև դա մյուս տարի ենք անելու:
– Իսկ փոխնախարար Արսեն Դավթյանի կաշառքի գործը կարելի՞ է Ձեր անհաջողություններից մեկը համարել:
– Դա կարելի է համարել անհաջողություն, բայց չպլանավորված, որևէ մեկը չի կարող նման անհաջողություն պլանավորել։ Ըստ երևույթին՝ դժբախտություն կարելի է համարել: Դա ցավալի է, և մենք մինչև հիմա շոկից մի կերպ ենք դուրս գալիս:
– Պարո՛ն Թորոսյան, Ձեզ չհաջողվեց ավելի շատ բարձրացնել ծխախոտի հարկը։ Այդ հարցում ո՞ւմ պարտվեցիք՝ Կառավարության տնտեսական հատվածի՞ն, թե՞ ծխախոտ արտադրողներին:
– Ես չեմ համարում, որ մենք պարտվեցինք, այդ ճակատամարտը դեռ առջևում է, այդ ճակատամարտը շարունակական է լինելու: Մենք ընդամենը չկարողացանք հասնել նրան, որ ոչ սովորական ծխախոտի ակցիզային հարկը բարձրանա այնքան, որքան սովորականի հարկը։ Իսկ ծխախոտի գինն ամենամեծ գործոնն է, որն ազդելու է ծխողների վարքագծի վրա։ Գովազդը, արգելքը, կրթությունն ամենաքիչն են ազդում։ Մենք շարունակելու ենք պնդել, որ այդ քաղաքականությունն իրականացվի:
– Դուք նաև անթույլատրելի էիք համարել Աննա Հակոբյանի այն նախաձեռնությունը, որ ծխախոտ արտադրողները յուրաքանչյուր տուփից 1 դրամ հատկացնեն նրա գլխավորած հիմնադրամին: Տիկին Հակոբյանի հետ ունեցե՞լ եք այդ թեմայով քննարկում, ինչպե՞ս է ընդունել Ձեր այդ դիտողությունը։
– Ես ներկայացրել եմ միջազգային առողջապահական հանրության տեսակետը՝ անկախ անձերից, և շարունակելու եմ ներկայացնել։ Այո՛, համարում եմ, որ ծխախոտային ինդուստրիայից բարեգործություն պետք չէ ակնկալել և նրա՝ մարդ սպանողի իմիջը չպետք է փոխվի մարդ փրկողի:
– Ընդունե՞լ է Աննա Հակոբյանը Ձեր այդ տեսակետը:
– Ես որևէ մեկի հետ չեմ խոսել:
– Ծխախոտի հարկը բարձրացնելու հարցի պատճառով Կառավարության նիստի ժամանակ վեճ ունեցաք վարչապետ Նիկոլ Փաշինյանի հետ: Շարունակելո՞ւ եք վիճել, պնդել, եթե ընդհուպ դա Ձեր պաշտոնի գնով լինի:
– Այո՛:
– Նախկին վարչապետ Հրանտ Բագրատյանը գրառում էր կատարել՝ մեջբերելով մի քանի տեսակի դեղեր, որոնք Վրաստանում, Ուկրաինայում ու Գերմանիայում ավելի էժան են, քան մեր երկրում։ Եվ որ դրա պատճառներից մեկն էլ ՀՀ-ում դեղերը գրանցելն է։ Ինչո՞ւ է կարևոր Գերմանիայում գրանցված դեղը ՀՀ-ում վերագրանցել։
– Ես համաձայն չեմ, որ գրանցումն է պատճառը, որ դեղի գինը բարձր է։ Դա ունի երկու պատճառ՝ դեղերի վրա ԱԱՀ-ի կիրառումն է, ինչը Վրաստանում չկա և երկրորդը՝ ՀՀ փոքր շուկան է։ Խնդիրը լուծելու մեխանիզմը բարդ է։ Օրինակ, երբ մի քանի փոքր երկիր միանան ու տվյալ դեղը գնեն։ Կամ երբ կլինի մեկ ընդհանուր շուկա, որը դեռ չկա անգամ ԵՏՄ-ում։
-Դեղերի դեպքում ԱԱՀ-ն հանելու կամ նվազեցնելու մտադրություն չկա՞։
– Մեր կողմից նման մտադրություն կա, բայց դա պետք է քննարկվի ընդհանուր հարկային քաղաքականության շրջանակներում։ Առաջարկել ենք, չի ընդունվել։
Հարցազրույցն ամբողջությամբ՝ տեսանյութում:
Արմինե Ավետյան
