16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
ՄԱԿ-ում Սիրիայի մշտական ներկայացուցիչն ԱՄՆ-ին առաջարկել է Իսրայելին մի քանի նահանգ նվիրաբերել
Քաղաքականություն
28.03.2019 | 17:32
ՄԱԿ-ում Սիրիայի մշտական ներկայացուցիչ Բաշար Ջաֆարին դատապարտել է ԱՄՆ նախագահ Դոնալդ Թրամփի կողմից Գոլանի բարձունքների նկատմամբ Իսրայելի ինքնիշխանության ճանաչումը և առաջարկել Հարավային Քարոլինան նվիրաբերել իսրայելցի գործընկերներին: Այս մասին հայտնում է Interfax-ը:
«ԱՄՆ-ն բավականաչափ հողեր ունի, որոնք մեծ տարածք են զբաղեցնում։ Դրանք կարելի է հանձնել Իսրայելին, օրինակ՝ Հյուսիսային կամ Հարավային Քարոլինան: Հարավային Քարոլինան շատ լավ տարածք է։ Եթե ԱՄՆ ղեկավարությունն իսկապես ցանկանում է իսրայելական կողմի աջակցությունը ստանալ, Իսրայելին մի քանի նահանգ թող նվիրաբերի»,- հայտարարել է Ջաֆարին ՄԱԿ-ի Անվտանգության խորհրդի արտահերթ նիստի ընթացքում:
Նա նշել է, որ Գոլանի բարձունքներն իրենց տարածքն են և իրենք այն կվերադարձնեն:
«Իմ երկրի կառավարությունը կարծում է, որ այդ փաստաթուղթն ԱՄՆ նախագահի կողմից նվեր է Իսրայելի վարչապետին: Այն միակողմանի նախաձեռնություն է, որը չունի քաղաքական, իրավական կամ բարոյական լեգիտիմություն և ոչ մի կերպ չի կարող որոշել մեր երկրի ճակատագիրն ու զրկել մեզ մեր երկրի անբաժանելի մաս կազմող տարածքից»,- ասել է Ջաֆարին։
ՄԱԿ-ում Սիրիայի մշտական ներկայացուցիչը հավելել է, որ նման մոտեցումը խոչընդոտում է ՄԱԿ-ի աշխատանքին և ցույց տալիս, որ ամերիկյան ղեկավարությունը ՄԱԿ-ի հետ այլևս հաշվի չի նստում, անտեսում է միջազգային լեգիտիմության վերաբերյալ բանաձևերը և գործում տարածաշրջանում խաղաղության վերականգնման դեմ:
Ըստ նրա՝ ամերիկյան ղեկավարությունն այս քայլով հայտարարում է, որ դադարեցրել է Մերձավոր Արևելքում խաղաղության հաստատման գործընթացքում միջնորդի իր դերը և խախտել ՄԱԿ-ի Անվտանգության խորհրդի 242, 497 և 338 բանաձևերը։
Հիշեցնենք, որ մարտի 25-ին ԱՄՆ նախագահ Դոնալդ Թրամփը փաստաթուղթ էր ստորագրել, որով ճանաչում է Գոլանի բարձունքների նկատմամբ Իսրայելի ինքնիշխանությունը: Դրան անմիջապես հաջորդել էր Սիրիայի պահանջը՝ ՄԱԿ-ի Անվտանգության խորհրդի արտահերթ նիստ հրավիրելու մասին:
Նելլի Մելքոնյան
