Ասել՝ սերիալներն այն չարիքն են, որ կործանում են մեզ և մեր երկիրը, մեծագույն սխալ է. Հրաչ Քեշիշյան. ՏԵՍԱՆՅՈՒԹ

Ես մեծ հաճույքով նայում եմ այն հեռուստասերիալները, որոնք բաղկացած են 16, 20 կամ 25 մասերից, որոնց մեջ կան ինձ հետաքրքրող թեմաներ: Այս մասին ԱԺ-ում պատասխանելով Factor.am-ի հարցին, թե պե՞տք է հայկական հեռուստաալիքները սերիալներ հեռարձակեն, ասաց ռեժիսոր Հրաչ Քեշիշյանը:

«Ասել, որ մեզ պետք չեն սերիալները և սերիալներն այն չարիքն են, որ կործանում են մեզ և մեր երկիրը, մեծագույն սխալ է»,- ասաց նա:

Դիտարկմանը, թե հայկական սերիալներում բռնություն է քարոզվում, դա ուղղորդվում է փողոցային բառամթերքով, Հրաչ Քեշիշյանն արձագանքեց. «Ձեր հարցը դրամատիկ է հնչում: Կարծում եմ, որ յուրաքանչյուր հեռուստաընկերության ղեկավար հետևում է որոշակի բարոյական նորմատիվների և կարողանում է ըստ այդմ կառուցել սերիալը: Գոյություն ունի տարիքային ռեյտինգի թվանշում, եթե ֆիլմի վրա կա այդ թվանշումը, ապա պետք է հետևել դրան: Բռնությունը հենց այնպես չի ցուցադրվում, այն ցուցադրվում է ինչ-որ պատմություն պատմելու համար: Որպես կանոն՝ յուրաքանչյուր պատմության ավարտին չարը պարտվում է»,- ասաց նա:

Անդրադառնալով այն հանգամանքին, որ այս շրջանում ավելի պահանջված են հնդկական, քան հայկական սերիալները, Հրաչ Քեշիշյանն ասաց, որ պետք է տրամաբանությունը հասկանալ: Նա հրաժարվեց պատասխանել «Արմնյուզ» հեռուստաընկերության հետ կապված հարցերի: Նշենք, որ նա այս հեռուստաընկերության գործադիր տնօրենն է, որտեղ վերջերս սեփականատիրոջ փոփոխություն է եղել:

Մանրամասները՝ տեսանյութում:

Նարեկ Կիրակոսյան